شمس البارودي تنفجر غاصبة وتهاجم الصحافة.. سيبوني في حالي اللي فيا مكفيني (تفاصيل)
في رد حاسم نفت الفنانة المعتزلة شمس البارودي ما تردد مؤخرًا حول استغاثتها، بسبب التصديق على قانون الإيجار القديم، مؤكدة أن ما تم تداوله مجرد “تحوير لكلمات كتبتها بروح خفيفة على صفحتها الشخصية”.
وكتبت البارودي عبر حسابها الرسمي بموقع “فيسبوك”: "عيب وكذب والله اللي بيتعمل ده أنا لم أستغيث بحد، وكنت بعلق على صفحتي بكلام كله ضحك، وبحكي على قطتي وفضلت الصحافة تتصل بي أشخاص بالاسم وأنا مش عايزة أرد، يا جماعة سيبوني في حالي اللي فيا مكفيني، وما فيش أغلى من اللي راحوا، وأنا لا أبكي على دنيا كلنا حنسيبها من الأمير للغفير".
وتابعت: "وكل ما في الدنيا من مال وجاه ومتع لا تساوي ظفر ابني أو زوجى اللي راحوا، الصحافة أخذت من فقرة على صفحتي أتحدث فيها عن نفسي وعملت عنوان كاذب، هل أنا ممكن أقول مصيري مجهول إيه التخاريف دي ياناس كلنا ميتون وحنتركها عاجل أو آجل، وربنا يهني الجميع المالك والمستأجر مش بيقولوا ربنا يهني سعيد بسعيدة خلاص أمر واقع لا يهز لي شعره على دنيا كلنا سنفارقها وماحدش يقولي كلام أنا لا أستغيث إلا بالله وأنا قلبي وعمره ما حيتوجع على حيطان".
وأوضحت: "أنا سبت شقة بإرادتي وبمزاجي في إسكندرية وصاحب البيت مشكور يقولي خليكي وأنا رفضت، فعيب ماتقولنيش كلام وعناوين غلط ما تخرجوش الكلام من سياقه بعناوين غلط غلط غلط والله عيب عيب، حنفضل نقول عيب كده على حاجات كتير وأهدى للجميع أغنية صفاء أبو السعود ((( ارقصوا وغنوا وافرحوا واتهنوا ))) جانا العيد أهو جانا العيد، حلو كده بتعجب والله قال قلبي موجوع !".
وأضافت شمس البارودي: "يا جماعة أنا قلبي اتوجع يوم ما فقدت ابني عبدالله وبعده بأقل من سنتين أبوه شريك عمري ونسي وسعادتي بإذن الله بلقاء بهم في الجنة يارب نكون من أهلها، وأنا بعتذر للأخوة الصحفيين أكيد جالهم أمر شوفوا شمس البارودي حتقول إيه؟".
وأكملت: "فحبوا يحطوا تحبيشة من عندهم بعنوان ** وجع واستغاثة ** على طريقة أفلام الفنانة الجميلة نادية الجندي، تحابيش لزوم نجاح ولفت نظر المكتوب، أرجوكم ماتقولوليش، يعني ينفع كده بعد صلاة الفجر بمسك مصحفي واقرأ الورد بتاعي قلت أبص على رسائل التليفون أطمن على ولادي لقيت صفاء أختي مطلعة على آخر الأخبار ومتطوعة بإنزالها على جروب الأخوات العملية على الواتس آب، وهي اللي نزلت برضو خبر التوقيع بالصور ماشاء الله صافي تنفع مراسلة صحفية وبتجيب لنا أحدث الأخبار المتداولة على السوشيال ميديا شكرا يا صافي".