حمزة علاء يودع الأهلي وجماهيره برسالة مؤثرة
ودع حمزة علاء، حارس مرمى الأهلي السابق، النادي وجماهيره بعد قراره عدم التجديد والرحيل خلال فترة الانتقالات الصيفية الحالية.
وقال حمزة علاء عبر حسابه الشخصي بموقع التواصل الاجتماعي "انستجرام": "أكيد الكلام جاي متأخر وعشان كده حابب أعتذر، من حوالي شهر أخدت أصعب قرار في حياتي، وهو إني أسيب بيتي بعد 16 سنة من عمري قضيتهم في النادي الأهلي".
وتابع "قرار الرحيل كان صعب، وكان مفروض أن أفكر في مستقبلي، ممكن الفرصة مجتش زي ما كنت أتمنى بس كل حاجة بتحصل بيبقي ربنا كاتبها ورب الخير لا يأتي إلا بالخير، جمهور النادي الأهلي العظيم محبتكم وشكركم عمرهم ما كانوا مرتبطين بعدد الدقايق اللي لعبتها دايما كنتوا سند في كل لحظة، في كل بطولة. وديما بحس معاكم إني أحسن حارس في العالم وأنا بلعب في بطوله افريقيا والاولمبياد، كل اللي طلبته، إنكم تفضلوا فاكرين إني كنت واحد منكم و ابن من ابناء النادي الأهلي، لإدارة النادي بقيادته الكابتن محمود الخطيب، شكرًا على كل لحظة حسيت فيها إني جزء من الكيان".
وأكمل: "لزمايلي إنتوا إخواتي وعيلتي اللي عمري ما هنسي أيامها وبتمني ليكم كل التوفيق والنجاح، ولكل مدرب اتمرنت معاه داخل النادي، شكراً من كل قلبي على كل لحظة دعمتوني فيها أو علمتوني فيها حاجة ، ولكل عامل تشرفت بالشغل معاه انتم عارفين معزتكم عندي".
وأضاف: "ولشعب الاهلي هفضل دائمًا مشجع للكيان من قلب التالتة شمال ويا رب أرفع راسكم وأكون عند حسن ظنكم في خطوتي الجايه، وتكونوا دائمًا في ضهري وسند ليا زي ما طول عمركم عودتوني".
واختتم حمزة علاء رسالته: "اشوف وشكم علي خير .. ابنكم حمزة علاء".