نقل ملك أحمد زاهر إلى المستشفى ومرضها يحير الأطباء (ما القصة؟)
تعرضت الفنانة ملك أحمد زاهر لوعكة صحية مفاجئة انتقلت على إثرها للمستشفى لتلقي الرعاية الطبية اللازمة، لافتة أن الأطباء لم يتمكنوا من تحديد مرضها بشكل دقيق.
ملك أحمد زاهر: بقالي 3 أيام تعبانة وعندي حاجة لحد دلوقتي مش فاهمين سببها وجت فجأة
ونشرت ملك أحمد زاهر صورة من داخل المستشفى عبر ستوري حسابها الشخصي بموقع تبادل الصور والفيديوهات "انستجرام"، وأرفقتها بتعليق كشفت من خلاله عن مرورها بحالة نفسية سيئة، منوهة بأن الهدف من الكشف عن إصابتها هو مشاركة الجمهور بالجانب السيء من حياتها مثلما تشاركهم الجانب المبهج.
وكتبت ملك أحمد زاهر: "أنا عمري ما كنت بنزّل غير الحاجات اللذيذة أو الهزار أو أي حاجة إيجابية من الآخر ولما كنت بحب أنزل حاجة سلبية كنت باخدها بهزار وبنزلها close friends وبهزر بيني وبين صحابي".
وأضافت: "بس بجد حاسة أن الفترة الأخيرة بيجيلي كومنتس كلها مانتي عايشة ومبسوطة واحنا مش عايشين وايه كل إللى انتوا فيه وحاسة أن في ناس بصة على أتفه الحاجات إللى ممكن تكون عندي اللي بتبسطني زي مثلا اني انزل اروح الجيم أو اخرج مع صحابي أو يكون شكلي حلو انا رايحة ايفينت معين".
وأردفت: "حبيت بس أقولكم أن الحياة مش وردي أنا بقالي 3 أيام تعبانة شوية وعندي حاجة لحد دلوقتي مش فاهمين سببها وجت فجأة وفي حوالي نص ساعة قبلها كنت زي الفل ومن ساعتها مش عارفة أنزل أو حد يشوفني باللي انا فيه ده ونفسيتي وحشة اوي انا بحكي الكلام ده عشان تعرفوا بس أن حياتي فيها الحلو والوحش والله زي أي حد بس أنا بحب دايمًا أشيّر الحلو بس وغالبا ده غلط فقررت أشارككم كمان الوحش".
واستكملت ملك: “ومع أن اللي بيحصلي دلوقتي انا بحمد ربنا عليه وعارفة إنه بإذن الله ها يكون حاجة بسيطة وإن شاء الله هاخف وكله هيكون تمام بس هو مخلي نفسيتي وحشة أوي حقيقي كل إللى طالباه انكم ما تحكموش على حد من السوشيال ميديا أو من ظهوره في أي حاجة لأنها بتوري بس يمكن 20% من حياته ووادعولي أخف بسرعة شكرا”.
واختتمت ملك زاهر منشورها بقولها: "والهدف من الإستوري دي مش أن أي حد يقلق لأن الحمد الله أنا كويسة وإن شاء الله إللى عندي ده ليه حل وانا تمام مافيش حاجة مقلقة انا بس حسيت اني محتاجة أشارك الوحش زي ما بشارك الحلو مش أكتر".
