الأرض نادت

الأرض نادت … مصر قامت جموع 
طوفان غضب .. هادر  .. يهز الربوع

يحمى بلاد الشام .. و القدس دار السلام

أرض العروبة  ..  قلبها موجوع 
و انتى الدوا … يا مصر

يا مسجد الصخرة .. يا مُرتقَى الإسرا 
يا مُلتقى الأديان ..  و الكلمة و العَذرا

الخوف خنق ضَىّ الوجوه .. و الشموع 
و البسمة نورها ما اختفى  .. بين الضلوع
أرض العروبة  .. قلبها موجوع 
و انتى الأمان .. .. يا مصر

نادى صلاح الدين .. بالعَفو  .. يوم حطين 
يا معتدين ارحلوا .. غصن الزتـون فى اليَمين ..
الحرب  .. بحر من الدّما  .. و الدموع 
و السلم .. يوصل كل شئ مقطوع

أرض العروبة ..  قلبها موجوع 
و انتى السلام .. .. يا مصر

مصر الحِما و الفِدا .. بتلبى قبل الندا 
تحمى ديار الجار .. ممن بغى و اعتدى

و المصرى ما يرضى بهوان أو خضوع 
و النصر أمرُه .. فى الميدان مسموع

أرض العروبة ..  قلبها موجوع 
و انتى الدوا .. و انتى الأمان .. و انتى السلام .. و أمرك مُجاب .. يا مصر ..

عبد السلام أمين .. اكتوبر ١٩٩٣