بالفلوس خلّص ودوس!

فى حاضر العصر والأوان، أجرى الملياردير «بنكوش» حوارًا صريحًا جدًاًاًا هذا الأسبوع مع ابنه «حنكوش» ليكشف الحقائق فى دقائق.
> الناس يا دادى شايفه الدُنيا «عناء» و«غلاء»!–وإحنا شايفنها بمبى والأسعار وردي!
> ليه الناس بتحقد علينا؟!–إحنا المليونيرات فى أى مكان تلاقينا وإن غبنا الناس تحقد علينا!
> يا دادى عندنا قصور وفلوس ياماااا؟!– ده الحظ أدانا وكلام الناس مش سايبانا!
> من أين لنا هذا يا دادى؟!–متزرزرنيش يا «حنكوش عينى»!
> فلوسنا بنستثمرها فى إيه؟!–طالما الفلوس فى جيبنا يبقى نعمل اللى يعجبنا!
> ليه الأسعار نااار ليل نهار؟!–علشان الدولار اللى معانا مولع الأسعار!
> الدولار تخطى الخمسين- «خمسة وخميسة» على اللى عندنا بالملايين!
> شعارنا يا دادى فى دنيا المال؟!–« لو تساوت الرؤوس أستحمل ياحنكوش»!
> خلاصة خبراتك فى إدارة الأعمال؟!–بالفلوس خلّص ودوس!
شواكيش ع التريند
> لو قلت لك: لخص حال الناس–أكيد هتقولي: ناس بتاكل لحمة وناس تايهه فى الزحمة!
> لو قلت لك: الدولار كسر حاجز الخمسين–أكيد هتقولي: راح راح خد الجنيه وراااح!
> لو قلت لك: أغنية أزعجتك عام 2024–أكيد هتقولي: يا واد يا دولار يا مشيبنا!
> لو قلت لك: رفع أسعار باقات الإنترنت وكروت الشحن- أكيد هتقولي: آلووه يا أمم آلووه!
> لو قلت لك: أغنية يتمنى سماعها الغلبان فى أسواق الغلاء! أكيد هتقولي: لحمة يا دنيا لحمة!
> لو قلت لك: أين أختفت الطبقة الكادحة؟- أكيد هتقولي: ورا مغارة «الدعم النكدى»!
> لو قلت لك: حمى رفع الأسعار اجتاحت الأسواق–أكيد هتقولي: اللعنة على الدولار!
> لو قلت لك: لعبة يجيدها الغلابة فى الأسواق- أكيد هتقولي: اللعب فى «سيرك الغلاء»!
> لو قلت لك: كحة الغلبان فى برد الغلاء–أكيد هتقولي: « بيكُح تُراب»!
> لو قلت لك: حظك اليوم فى فصل الشتاء- أكيد هتقولي: لا تؤجل « عدس» اليوم إلى الغد!
> لو قلت لك: صبح على الغلبان ولو برغيف عيش- أكيد هتقولي: ساعة العجن « متتعوتش «!
> لو قلت لك: سلم نفسك لأقرب مكتب تموين- أكيد هتقولي: لا داعى للهروب الدعم محاصر!
> لو قلت لك: شكواك مجابه اليوم- أكيد هتقولي: أشكى لمين وكل الناس مجاريح!
> لو قلت لك: 65 مليون تحت حد الفقر- أكيد هتقولي: بدون حسابة دى الحسابة بتحسب!
> لو قلت لك: حسبة برما–أكيد هتقولي: تسعة أعشار الحكومة «جباية» والعشر الأخير غلاء!
> لو قلت لك: الإقبال فاق على كراسات سكن المصريين–أكيد هتقولي: الحصيلة بالملايين!
> لو قلت لك: هيعمموا لعبة الشطرنج فى المدارس- أكيد هتقولي: « كش وزير «!
> لو قلت لك: محدش بيتعلم بالساهل- أكيد هتقولي: يا وزيرنا يا لطيف يا لطيف!
> لو قلت لك: اكتشافات جديدة فى الغاز والبترول- أكيد هتقولي: كده كده غازنا لغيرنا!
> لو قلت لك: لا تغامر بتوظيف أموالك لدى «المستريح»- أكيد هتقولي: رااح مطرح ما راااح!
> لو قلت لك: قيادات جديدة بالمحليات- أكيد هتقولي: يا ريت نطوى صفحات «الفساد للركب»!
> لو قلت لك: معزوم على مطعم الشيف التركي- أكيد هتقولي: يِدى «العضمة»  للى بلا سنان!
> لو قلت لك: حزين على إيه؟! أكيد هتقولى: حزِين على «الجنيه» اللى قيمته خس للنص!
> لو قلت لك: نصيحتك الأخيرة ع التريند- أكيد هتقولي: حط الكوز تحت البزبوز!