متحدث الزمالك الرسمي يكشف تفاصيل المرحلة القادمة للنادي
كشف أحمد سالم، المتحدث الرسمي لنادي الزمالك، تفاصيل المرحلة القادمة للفارس الأبيض، بعد حالة القلق التي تنتاب الجماهير البيضاء بسبب عدم الإعلان عن التعاقدات خلال فترة الانتقالات الصيفية الحالية.
وقال سالم عبر برنامج "أخبارنا" على قناة الزمالك: “جمهور الزمالك ليه حق يقلق على فريقه ويبقى دايمًا عايزه أحسن وأفضل وبيدور على المعلومة بمنتهى الحب ودول نقدر تمامًا اهتمامهم”.
وتابع: “في جانب تاني ناس عايزة تريند وعايزة أخبار فمتغاظة جدًا إن مفيش مادة ماتيريال يشتغلوا عليها يشوهوا بيها النادي أو يعملوا إشاعات عن مشاكل أو غيره والمشكلة المرة دي كمان اللي مقابلاهم إن مفيش مادة ولا حلوة ولا وحشة”.
وأكمل: “يعني ولا أخبار تعاقدات ولا أخبار صفقات ولا حتى خناقات ومشاكل وغيره، هما مش قادرين يوصلوا لأي معلومة من جوه النادي لدرجة إن البعض فسرها بإن مفيش حاجة بتحصل في النادي، لكن الحقيقة النادي شغال على الملفات من بعد نهائي كأس مصر”.
وأضاف: “العمل يجري على قدم وساق ومجهود كبير جدًا من كل مجلس الإدارة ومن كل اللي ماسك ملف مجتهد فيه جدًا وإن شاء الله قريب قوي خلال أيام النتائج هتبان”.
وتابع: “بداية من المدير الفني طبعًا وقائمة جديدة ومعسكر ولاعيبة واستعدادات، وكل ده بيتم الإعداد ليه بمنتهى القوة على عكس ما البعض بيروج”.
واختتم سالم: “بطمن جمهور الزمالك إن شاء الله القادم أفضل كثيرًا بإذن الله”.