عمليتان كبيرتان بعد انفجار الزايدة.. تامر حسني يشكر جمهوره على الدعاء لابنه آدم
وجّه الفنان تامر حسني رسالة شكر وامتنان لجمهوره ومتابعيه بعد الكم الكبير من الدعوات التي تلقاها من أجل شفاء نجله آدم، موضحًا أن ابنه خضع لعمليتين جراحيتين كبيرتين نتيجة انفجار مفاجئ في الزائدة الدودية.
وقال تامر في منشور مطوّل عبر حسابه الرسمي بمواقع التواصل الإجتماعي فيسبوك:“أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني، اللي جاتلي منكم هنا و على تليفوني و تليفونات كل المحيطين بيا، هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس”.
وأضاف الفنان: “و بقولكم كده عشان تبقوا حريصين مع نفسكم أكتر ولولادكم، ومش كل سخونية تقولوا ده شوية برد و خلاص، لا، روحوا اكشفوا كويس و اعملوا سونار على البطن و الزايدة مرة و٢، عشان برضو ساعات مش بيبان ولازم الدكتور يضغط بطريقة معيّنة، تقريباً أقوى شوية عشان يعرف”.
وأردف حسني: “لإني سمعت كتير اليومين دول إن الزايدة خادعة… اطمنوا كذا مرة قبل لحظة انفجارها، عشان بجد مشاكل بتحصل بعدها كبيرة و محزنة أوي”.
وتابع حديثه عن الوضع الصحي لنجله قائلًا: “و حبيبي آدم عمل عمليتين صعبين أوي عليه، وبدعواتكم مستنيين النتايج تكون خير يارب و يعدي مرحلة الخطر، يارب، بحق ‘كن فيكون’، اشفيه وعافيه، هو و كل ولادنا”.
وأكد تامر أن نجله يتمتع بقوة تحمُّل رغم صعوبة ما مرّ به، مضيفًا: “بس هو راجل و هيتحمل وإن شاء الله ربنا يكرمه و يعافيه و يحفظه هو و إخواته و يحفظ كل ولادكم يارب”.
واختتم تامر رسالته قائلًا: “وأحب أقول تاني شكراً من كل قلبي على دعواتكم أنا شايف قلب كل حد فيكم و هو بيدعي بصدق، متشكر أوي يا جماعة شكراً لكل اللي اهتم وسأل عن ابني و دعاله هنا أو على التليفون، واللي طلعوله صدقات لشفائه من غير ما يعرفونا شخصياً، أنا مش لاقي كلام أشكركم بيه، و أنا برضو بدعيلكم و بقول لكم مثلها وأضعاف أضعافها، و ربنا يحفظكم ويحفظ أولادكم، قادر يا كريم ”.
