منى زكي تتحدث بلا حسابات .. 15 تصريح مثير من الجونة

الإثنين 19/أكتوبر/2026 - 12:10 ص

راندا جمعة

أكدت الفنانة منى زكي أن مواجهة الخوف والخروج من منطقة الراحة يمثلان جزءًا أساسيًا من رحلتها الفنية والإنسانية، مشيرة إلى أن اختيار الأدوار الصعبة يمنحها فرصة لاكتشاف قدرات جديدة وتقديم تجارب مختلفة، وذلك خلال حوارها مع الإعلامية لميس الحديدي، على هامش فعاليات الدورة التاسعة من مهرجان الجونة السينمائي.

أبرز تصريحات منى زكي:

ما تسمحوش للخوف يتحكم في حياتكم، واجهوه عشان تقدروا تكملوا الطريق.
بحس إن جمهور مهرجان الجونة عيلتي الكبيرة، وسعيدة وممتنة للتكريم.
جيلنا عاش فترة فيها هدوء وطيبة، وكنا جنب أساتذة كبار، وبعدها لقينا نفسنا قدام زمن أكثر رعبًا.
الخوف موجود عند ناس كتير، لكن فيه اللي بيعرف يتغلب عليه، وفيه اللي بيتجمد مكانه ومش بيقدر يعمل أي حاجة.
من أجمل الحاجات اللي ممكن تحصل للفنان إن شخص ميعرفوش يقوله إن شغله أثر فيه ولمس تجربة شخصية عاشها.
الفن بيخلق لحظة مشتركة بين الفنان والجمهور، حتى لو مفيش معرفة سابقة بينهم.
بحاول أحب الشغل اللي بقدمه وأكون مخلصة له، وأسيب النتيجة على ربنا.
ليه بنفضل نفكر في النجاح طول الوقت، طالما بنعمل حاجة إحنا بنحبها، سواء نجحت أو لأ، وجابت فلوس أو لأ؟.
مهم ألا نسمح لردود الفعل اللي جاية من بره إنها تخلينا نكره حاجة إحنا بدأناها بحب.
بحاول أعالج خوفي بأني أتحدى نفسي وأخرج من منطقة الراحة.
لما أحس إن الدور بعيد عني أو إني مش هقدر أعمله، دي اللحظة اللي بتخليني أقرر أخوض التجربة.
ممكن أحس إني مش أنسب واحدة للشخصية، لكن بقرر أحاول وأبذل أقصى جهدي عشان أقدم حاجة جديدة.
الشغل اللي مفيهوش تحدي ممكن ميدينيش نفس إحساس المتعة.
أنا عايزة أكتشف قدرات جديدة عندي وأقدم أدوار مختلفة عن اللي عملتها قبل كده.
أمال أنا بشتغل ليه؟.. مش لازم كل حاجة تمشي بسهولة، المهم أخوض التجربة وأحاول أقدم حاجة مختلفة.

وتأتي تصريحات منى زكي خلال مشاركتها في فعاليات الدورة التاسعة من مهرجان الجونة السينمائي، حيث التقت الإعلامية لميس الحديدي في حوار تناول علاقتها بالخوف، وطريقتها في التعامل مع تحديات العمل الفني، ورؤيتها للنجاح واختيار الأدوار التي تمنحها فرصة لتقديم شخصيات وتجارب مختلفة.

وتطرقت الفنانة خلال اللقاء إلى طبيعة العلاقة بين الفنان والجمهور، موضحة أن التأثير الحقيقي للعمل الفني يظهر عندما يجد المشاهد جزءًا من تجربته الشخصية أو مشاعره في الشخصية التي يقدمها الممثل، وهو ما يمنح الفن مساحة للتواصل الإنساني تتجاوز حدود المعرفة المباشرة بين الطرفين.

كما تحدثت منى زكي عن أهمية خوض التجارب غير المألوفة وعدم الاكتفاء بالأدوار التي يشعر الفنان بالراحة تجاهها، معتبرة أن التحدي يمثل دافعًا لاكتشاف إمكانات جديدة وتطوير أدواتها الفنية، في الوقت الذي تسعى فيه إلى الحفاظ على حبها للعمل بعيدًا عن الضغوط المرتبطة بالنجاح وردود فعل الجمهور.