فض وجع (شعر)

فض وجع 

الليلة دي بالذات 
غرقت روحي بدمعتين 
فضوا بكارة كل أحلامي
معرفتش اصرخ وقتها
ولا كان لي حيل 
أشق قلبي 
ف يبان كل الوجع 
كان اللي جوايا أكبر كتير
من بوح هايخلص في دمعتين 
وانا كنت بتهجى السنين في عنيك

طب مين اللي شد
من روحي الثبات 
ورماني وسط الأسئلة... 
من غير جواب 
يسد جوع 
الخلق وفضولهم
من شد من جوفي الوريد ورماني
وسط الخوف

وانا احتياجي وقتها للضمة
للوقت 
كان أصدق
من كل أسباب الفراق 
معرفتش اوصف وقتها 
هزيمتي 
وإن رغم قوتي وصلابتي  
أضعف من كل فراشات الحياة
أسوأ ما فيا الحب بزيادة
معرفشي غير إني بعرف احب

سنيت ضوافرك وقتها
خربشت روحي 
فضيت مشاعري 
غرقت كل أطراف المكان 
عريت في روحي وقتها 
فضحتها
مفهمتنيش 
ونصبت ليا المحكمة

حسبتك تشبه قساوة الدنيا وجفاها 
حسبتي تشبه خضار القلب  

ومن احتضار الحب في القلب
لاحتباس الدمعة العنيدة 
جوا العين
لشق النفس في الليل
وكسرت القلب الوفي  
لصوت الفراغ في الروح 
والوحدة والخوف 
للفرقة  
شيء مميت

شقيت ضلوعك وقتها 
وخرجت من ضلعك 
قلبي اللي حسك وشافك حياة 
وراهن عليك كل البشر 
هو الوحيد اللي شاهد 
قسوتك 
أنا أكتر حد بيفهم
حس الناس والمعنى  
المشهد كان أسوأ من إني احكيه 
وأترجم كل الوجع المداري

العالم همجي بطبعه 
والناس الناس 
مش دايما حساك