اتقطع النور (شعر)

                        اتقطع النور
 

اتقطع النور جواكم
فخرجت أكمل كل حالاتي
على حبة ضي بيتسرسب
من لمبة جاز
على حبة خيالات
لملامح رسمة بريئة
على حبة أحضان 
من بيتنا اللي بيشبه كل ملامح ابويا  
لبيوت الحارة 
وهو بيسند على كل حيطانها 
وقت صلاة الفجر
لخطاوي الليل وهو بيسقي
الشارع بدموعه
ويسمع خوفه
لعمود النور الواقف على ناصية بيتنا
أنا لسه لحد الآن سمعاه
عشرين سنة عدو على فراقك
ولسه لحد الآن سمعاه
صوتك في وداني
وخوفك لسه معشش جوفي
وخطاويك الطيبة
لساها حكاوي في بُق عيال الشارع 
كبروا صحيح لكن لسه فاكرينك
زارع جوا بيوت الشارع
وفي كل قلوب الناس
مواويل من روحك وقلبك
من عطر كلامك 
من طيبة قلبك 
وانا لسه لحد الآن على عهدك 
لساني يا ابويا بصون الود 
وبخاف على ظلم الناس 
وبخاف م الذنب 
لسه كلامك جوا في روحي معشش

***
بتعيط ليه يا حزين
على ابوك
اللي مشفش عيالك
ولا داقش الحنية من
نبض قلوبهم
نزت حيطان البيت وجع
ودموع فراق…
لساها أمي
لابسه غوامق
لساها قالعة دهبها
وحلفت ما تدوق

  العين طعم الكحلة