والد سوزي الاردنية: 'بنتي معهاش 15 مليون جنيه وعايشه معايا في المطرية"

علق أيمن والد التيك توكر سوزي الأردنية على توجيه تهمة غسل 15 مليون جنيه لأبنته،  قائلا:  “اللي بيتقال عن بنتي مش حقيقي، و لحد دلوقتي ما حصلش معاها اي تحقيق رسمي، وكل اللي حصل مجرد اتهام”.

واضاف والد سوزي : “بنتي لما تركب اوبر بتقول لي يا بابا ادفعلي الاجرة، وبتاخد مني مصروف، يعني ازاي معاها 15 مليون جنيه؟ الكلام ده مش صحيح”.

وأوضح والد سوزي الأردنية، ان  ابنته  تقوم بعمل اللايفات  ولكنها لم تحصل على كم الأموال التي تتحدث عنها الناس،  قائلا: “بنتي  ما قالتليش ان حد عرض عليها شقق، وبنتي بتحكيلي على كل حاجه”.

وعن الاعلانات، قال: “هي ما بتاخدش 100 الف جنيه زي ما الناس بتقول، ده بالعافية بتاخد 30 او 40 الف، وبتصرفهم على لبس واكل وسكن، الشقة اللي في مدينتي دي ايجار عشان التصوير، لكن هي عايشه معايا في شقة في مساكن المطرية”.

واختتم كلامه قائلا: “لو بنتي معاها 15 مليون، كنا سكنّا في حتة محترمة، وبقول للناس ما تتكلموش على بنتي، هي ضحية وبيتضحك عليها، وربنا يظهر الحقيقة قريب”

وكان قطاع مكافحة جرائم الأموال العامة والجريمة المنظمة بالتنسيق مع أجهزة وزارة الداخلية المعنية اتخذ الإجرءات القانونية ضد صانعة المحتوى سوزي الأردنية المقيمة بدائرة قسم شرطة المطرية بالقاهرة، وذلك في اتهامها بغسيل أموال.

وتبين أن المتهمة أجرت غسيلا لـ الأموال المتحصلة من نشاطها غير المشروع في إنشاء وإدارة صفحة بمواقع التواصل الاجتماعي، واستخدامها في نشر مقاطع فيديو تتضمن الاعتداء على قيم ومبادئ المجتمع، بهدف زيادة نسب المشاهدات وتحقيق مكاسب مالية غير مشروعة بالمخالفة للقانون.

وأوضح قطاع مكافحة جرائم الأموال العامة، أن المتهمة لجأت لذلك بهدف زيادة نسب المشاهدات وتحقيق مكاسب مالية غير مشروعة بالمخالفة للقانون، إضافة إلى محاولتها إخفاء مصادر تلك الأموال وإصباغها بالصبغة الشرعية وإظهارها وكأنها ناتجة عن كيانات مشروعة عن طريق شراء الوحدات السكنية.

وقدرت أفعال الغسل التي  ارتكبتها سوزي الأردنية بمبلغ 15 مليون جنيه تقريبًا، تم اتخاذ الإجراءات القانونية.