تعليق مثير للجدل من مروان حمدي بعد التتويج بدوري الأبطال

 خرج مروان حمدي، مهاجم بيراميدز، بتصريحات قوية عقب تتويج فريقه بلقب دوري أبطال أفريقيا، مؤكدًا فخره بما حققه هذا الموسم، موجهًا رسائل واضحة للإعلام وبعض الجماهير التي ساندت المنافس الجنوب أفريقي على حساب الفريق المصري.

وكتب مروان حمدي عبر صفحته الشخصية بموقع التواصل الاجتماعي "فيس بوك": "الحمد لله، إحنا أبطال أفريقيا بعد تعب كبير جدًا وموسم عظيم لينا، ربنا كرمنا بأغلى وأهم بطولة، كسبناها عن استحقاق وبمجهودنا وتركيزنا وإصرارنا".

 وأضاف: "فخور جدًا بينا وبأخواتي أحسن لعيبة في مصر وأفريقيا، وأنضف شخصيات، كل فرد داخل منظومة بيراميدز يستحق الشكر، وشكرًا جدًا للجمهور المحترم اللي جه ساندنا النهارده، حقيقي كانوا ناس جميلة جدًا، مفيش نادٍ في العالم بيتولد بجماهير، لكن الشعبية بتتعمل واحدة واحدة، والناس هتبدأ تشجع بيراميدز، وأنا واثق في ده إن شاء الله".

 وتابع: "وقتنا دلوقتي نستمتع، وعايز أقول معلش لأي حد كان عايز يشمت فينا، أو كان بيتمنى نخسر، معلش جدًا، صعبان عليا والله، ألف شكر لإعلامنا الجميل المحايد العسل النموذج على النزاهة والأمانة في الشغل، وعلى اهتمامه ببيراميدز الفترة اللي فاتت، وإنه فريق مصري وصل نهائي أفريقيا وتغطية جميع أخباره ومتابعته".

 واختتم: "والمناسبة، إحنا مكناش محتاجين دعمكم في حاجة، بس أنتم فعلًا واضحين جدًا للجميع، إلا من رحم ربّي، لكن ده العادي من إعلامنا المعروف عنه إنه بيشتغل الشغلانة صح بمعايير الإعلام المضبوطة، مش بيخاف من حد ولا شغال مصالح شخصية وماشي مع القطيع، الحمد لله.. وأخيرًا هارد لك لمشجعي صن داونز الناطقين باللهجة المصرية".