خالصة وملعوبة خرسا!

داخل أستوديو الهواء، يستعد المذيع الفرفوش «سمورة الأطروش» لتقديم حلقة جديدة من برنامجه «على بلاطة»، حيث يستضيف الدكتور «بِنكش بنكوش» الخبير الجهبذ فى عالم المال والأعمال.
< اتفضل سامعك يا دكتور بِنكش - لما بسمع صوتك يا سمورة قلبى بيطير م الفرحة!
< هات آخرك فى الكلام؟ - مش هكلمك ولما تخلص كلامك هعلملك!
< لو مش عاجبك الكلام هقفلك سكة الحوار- مش هقول أى كلاااام عن قسوة الدولار!
< ليه الكلام ده يا دكتور بٍنكش؟! - علشان الكُبارعن لعنة الدولار ما بيتكلموش!
< تجارة العُملة سوء اختيار؟! - لو حد مش فاهم لعبة الدولارهتلاقيه طار!
< اصحى للكلام ياللى فاهم تمام - الدولار طالع طالع ضرب نار!
< الكبير يِفضل كبير لحد ما يغلط؟!- لو مفيش حد بيغلط مكانوش حطوا فوق القلم أستيكة!
بينما كان الميكرفون مفتوحاً والبث الإذاعى مستمراً..فجأة نبهت المُخرجة «نفوسة العنوسة» المذيع الفرفوش عبر المايك الداخلى: يا أستاذ «أطروش» إحنا لسه ع الهوااا.. وبلغونا دلوقتى أن الضيف مطلوب ضبطه وإحضاره فى قضية تزويرفى أوراق رسمية، علشان شهادة الدكتوراه طِلعت لا مؤاخذة «خالصة وملعوبة خرسا»!!
شواكيش ع التريند
< لو قُلت لك: لسان حال الناس الغلابة - أكيد هتقولى: الصبح آهى عيشة وآخر النهار تعيسة!
< لو قُلت لك: 45 ألف جنيه لمن يعثر على كلب فنانة - أكيد هتقولى: هوهو ولا زى زى!
< لو قُلت لك: آآآه لو لعبت يا عمرو- أكيد هتقولى: كفاية لعب وزمر ورقص ع الفضاحيات!
< لو قُلت لك: حلم حياتك فى زمن التعويم؟!- أكيد هتقولى: ليل نهار كُل معاملاتى بالدولار!
< لو قُلت لك: ارتفاع جنونى للدولار الأخضر- أكيد هتقولى: طريقك أخضر مفروش بالجرجير!
< لو قُلت لك: تزايد الأسعارفى أسواق الغلاء- أكيد هتقولى: بشويش ع الغلابة!
< لو قُلت لك: أكلتك النهاردة على قد الإيد؟! - أكيد هتقولى: هتاكل صوابعك!
< لو قُلت لك: برامج الطبخ عالفضائيات- أكيد هتقولى: اللى تشوفه العين هتتحرم تاكله بعدين!
< لو قُلت لك: تهديدات الدولار فى الأسواق- أكيد هتقولى: الدولار ضرب نار مش أكل فيشار!
< لو قُلت لك: الإعلام الجديد رايح على فين؟!- أكيد هتقولى: سكة اوعى تفنجل عينيك!
< لو قُلت لك: تطوير الإعلام فى شكل جديد- أكيد هتقولى: عند «بابا المجال» الخبر اليقين!
< لو قُلت لك: لغة «نميمة» الناس فى الأسواق- أكيد هتقولى: ده قال وده عاد وده الدولار زاد!
< لو قُلت لك: آخرة أزمة «التابلت» فى المدارس- أكيد هتقولى: هتدفع يعنى هتدفع!
< لو قُلت لك: منع بث البرامج الرياضية بعد مُنتصف الليل- أكيد هتقولى: آآآآآآه يا ليييييييل!
< لو قُلت لك: ورطة وندمان عليها- أكيد هتقولى: عزومة المدام فى مطعم الشيف «بوراك»!
< لو قُلت لك: هل أنت محظوظ؟! - أكيد هتقولى: الحظ ادانى والدولار كسر نفسى من تانى!
< لو قُلت لك: لغة التهديد فى الملاعب- أكيد هتقولى: لو مش هتلعبنى هبوظلك الملعب!
< لو قُلت لك: قسوة الدولار مع آلاعيب التُجار- أكيد هتقولى: اللى يلعب معاه يستحمل قفزاته!
< لو قُلت لك: طبخة أورديحى تناسب الغلابة- أكيد هتقولى: مفيش غيرها.. الطبخة السودا!
< لو قُلت لك: بعد حفل التخرج إنتى اشتغلى إيه؟!- أكيد هتقولى: اشتغالة بالوكالة!
< لو قُلت لك: وبعد كده فهمنا - أكيد هتقولى: ولما فهمنا فكرنا ولما فكرنا محدّش فاهم حاجة!
< لو قُلت لك: آخر كلمات العتاب ع التريند- أكيد هتقولى: اللى ضيّعنا خِسر دلعنا!