> طبعاً تايه وحيران.. دا الزمن عدى.. هل فات الأوان؟!
> إن الحكم لله.. عايزين تحكموا على الناس، زى ما تكونوا عارفين حكم ربنا فى عباده إيه؟ هو ربنا منحكم صكوك الغفران طبعاً لأ وألف لأ.. أمال عاملين كدة ليه؟!.. غوروا فى داهية.. زهقنا.
> النوم صبح تخاطيف، سلم أمرك لله، نام واعجن واشرب واتمتع بزادك واعرف أن لا حد يوم حيونسك غير ظلك ولو رحت فين الغربة هى ملاذك، تضحك ساعات وساعات تمزقنا الآهات على ما جرلنا ويجرالنا يا سيدى كل واشرب واعجن كمان وحقق مرادك.
> الفساد الأعظم سبب تدهور مصر، دول العالم كلها فيها إرهاب ولكنها تتقدم ونحن نتأخر السر عندنا فى فساد الإدارة وسيطرة الفساد وعدم تفعيل الديمقراطية الحقيقية.
> الحكومة مضروبة بالوهابيين والسلفيين والأزهر كمان مثل الحكومة مقصر ولن يغيروا شيئاً إلا بعد أن يتغيروا ويتطهروا من المتطرفين والفاسدين.
> الحكومة اشترت الكفن يوم ما حلفت اليمين زى اللى قبلها وقبلها وقبلها منذ عام 1952 وتجارة الأكفان رايحة والحانوتية مبسوطين والشعب بيموت كل ساعة من الجهل والفقر والمرض والجوع.
> هانت عليك ضحكتك فرطت فيها إزاى والنوم عندك صبح تخاطيف أتارى البحر غويط وانت مش عويم والناس بقوا بوشين وانت حصيف وغشيم الضحك ساعات وساعات تمزقنا الآهات والجوع والبكاء على زمن فات.
> السيسى والجيش حاضنين البلد لو شالوا إيدهم سقطت مصر فى الوحل الغطيس.. الجيش بيبنى ويطهر المجارى ويبيع الفراخ والفاصوليا وبيحارب يا ولداه وولاده ولاد مصر بتموت.. منظومة فدائية وطنية عظيمة.. أنقذوا مصر لحد النهارده.. ولكن هو شغل الجيش يسلك المجارى ويعمل كدة.. طبعاً لا.. ولكن كل ده بيحصل علشان الحكومات المتكفنة والفساد المتفشى والأحياء المرتشين والمخترقين.. وسايبنهم ليه؟!
> البرلمان ده واللى قبله مليان لواءات كمان الأحزاب والمستقلين والقايمة النايمة اللى فى غير حب مصر، شغل فبركة وتفصيل ما صدقنا ثورتين لنغير ولكن اللواءات وتدخل الحكومة فى البرلمان.. وقال وزعلانين على رفض قانون ده كله كسر نفسنا وحطنا وسرق النوم مننا.
> آه يا زمان وآه وآهين أنا اشتكيت وبكيت عند الله، الله ادانى أمانة، شلتها فى صرة حطيتها فى عنيا وقلبى وقفلت عليها.. سرقوها منى العباد.. مش بقولك فساد وإجرام وذمم خربانة.
> الناس تاهت وقالت خلاص اللى يضيع النهاردة ممكن نلاقيه بكرة، اعرف ولا حد حيونسك فى الغربة بعد ما كان الفرح سكرتك والضحكة عندك كيف.. يا خسارة يابنى ويابنتى ده الندم بقى عندكم كيف.
> لو نطقت الحكومة وغلطت وتكلمت عن الفساد تتكلم فقط عن فساد الصغار وتطنش عن فساد الكبار.. عش الدبابير حاكم ومتحكم وبيحكمه لواء والا وزير المهم الفساد سلطان وبيهد كل حد ممكن يحلم بالطهارة والتغيير.. والله مافيا وتركيبة شيطانية عمرها 60 عاماً ناهبة وكانسة وعاملة البحر طحينة.
> مصر عاشت 25 سنة فى حروب من 1948 حتى 1973 والتحديات فى المجتمع لها شكل تانى بعد 1973 ولها سلوك مختلف.
> بدأنا فى 1974 نعيش السلام حتى جاء 2015 يعنى حوالى 41 سنة من غير حروب.. هدوء تام.. عملنا إيه لمصر والمصريين؟ ولا حاجة سوى إشاعات وأغانى عن السلام والرخاء.
> فساد الذمم وصل إلى الذروة فى الكبيرة والصغيرة.. لم يحدث أى تغيير لأى منظومة فى الشأن الداخلى بعد الثورتين.. هل هى فترة الانتقال التى تعقب أى ثورة، لابد يا سيسى تلجأ إلى الحزم فى الشأن الداخلى وإجراء التطهير وتفعيل العزل السياسى.
> سايق عليكى النبى ابتسمى يا أيام ولا تكلمى القلوب، ولو النهار أنصفك الليل حيجيلك ومن بلاد لبلاد ومن عباد لعباد، دنيا الفرح والحزن لكل مصرى طيب مالهومش فيها ميعاد.
> مصر يا حبيبتى الورود على أرضك بقالها سنين بها أحزان، حتى المطر خير ربنا اتجمع من دموع السحابات اللى بتبكى على حالنا وأحوالنا قولولى إيه يرضى الإنسان الغنى والغلبان وشعبنا ملايكة على ديابة وده حال الدنيا، دنيا وخدانا معاها وممشيانا على هواها، جيتى علينا يا دنيا ولا رحمتى مصرى ولا مصرية عانينا كتير وتاهت ليالينا وملقناش أى مرسى على أى مينا.
> نرجع نقول حلوة الدنيا لكن بصراعها وديابها وحملانها عايشين فى سيرك الناس فيه بترقص بين التكاتك وعلى حبال دايبة.. ومن كتر أوجاعنا بيقل متاعنا..غلابة يا مصريين.
المنسق العام لحزب الوفد
رئيس لجنة الثقافة والفنون