قطوف
لدغات الوقت (شعر)
لدغات الوقت
راجعة
من عند آخر خطوة خطِّيتها
لطموحي
ولقيتني راقدة
عطشانة روحي
والدنيا حواليا
زَي بير مهجور ...
قشَّرت يُومي كإنه تفاحة
وكإني بـ اصحَى من جديد
قطَمت قَطمة الصُّبح
وبلَعتها بالليل
إيه اللي خلَّى دقيقة تبقى ساعات
مين اللي زَق الخطوة عـ المسافات
مين اللي وَلِّف ريقي عـ الإبريق؟!
الأمل...
يقدر ينَضَّف مـ الطُرُق عجزك
ويرُش مَيَّه كل يوم
ويهادي قلبك كل ليلة نجوم
والسما يبعتها عندك!
زي ما تكون الحياة هَزِّت فروعها
وانا فاردة عمري تحتها عباية
ما اختَرتش اَلقُف مِنها إيه
ولا شُفت طرطوفة غواية
كنت أبسط من مشاعري
من سؤالي ومن إجابتُه
من إني اقول نِفسي في شيء
غير اللي خدتُه
لَمِّيت منابي بسُرعِة العُمر ومِشيت
بس طول السكة حَبَّات السنين
متبعترين تحتُه...
مش هيقدر عـ الزمن
غير اللي خالقُه
وعشان كده
حلمي اللي بـ امشي لُه فْ ثواني
بيتحقَّق في عُمر
والأمل جايز منوَّر لي الطريق
وشال يامَا
عقارب سِكة ومسافة
لكنُّه ما نجِدنيش لمرة
من لدغتي من عقرب الساعة...
عايشة بِـ سِم الوقت
بيهدِّد شعوري
ويهدِّد ملامحي
ويهدِّد الصبر اللي شَبطان في الحقيقة
والأمل
لسه مبقَّع في السما غيمة
جايز تمَطَّر
وجايز لأ
بس جوايا المحاولة
لسه عطشانة
ولسه مش قابلة الهزيمة!