تفاصيل جديدة في قضية عبد الحميد معالي وعقوبة الزمالك
كشف الإعلامي كريم رمزي عن تفاصيل جديدة بشأن أزمة عبد الحميد معالي مع نادي الزمالك، والعقوبة المالية الموقعة على النادي من جانب الاتحاد الدولي لكرة القدم «فيفا»، موضحًا موقف الزمالك من الحكم وخطواته المقبلة.
وقال كريم رمزي خلال تصريحات عبر برنامج «من القاهرة» المذاع على قناة «أون سبورت ماكس»: «قصة عبد الحميد معالي، أنتوا تقريبًا عرفتوا معظمها النهارده، ولكن جاي لك بشوية معلومات جديدة».
وأضاف: «عبد الحميد معالي خد عقوبة على نادي الزمالك قيمتها 611 ألف دولار، وخد الحكم، والحكم كنا فاكرين إنه نهائي، لكن لما سألنا في نادي الزمالك قالوا: لا، ده هم قدموا استئناف ودفعوا بالمناسبة فلوس الاستئناف، اللي هم 1000 فرانك، واللاعب هياخد 611 ألف دولار، والزمالك بيحاول يقلل الرقم ده».
وأوضح: «عبد الحميد معالي كان طالب 900 ألف دولار، لكن الفيفا حكم له بـ611 ألف فقط، وما زال الزمالك شايف إن الرقم كبير ويأمل في تخفيض هذا الرقم».
وتابع: «عبد الحميد معالي كان جه نادي الزمالك، والزمالك دفع فيه 500 ألف دولار. حط الـ500 على الـ600، وحط الـ11 ألف دولار دول على جنب، يعني حوالي مليون و110 آلاف دولار».
وأردف: «عبد الحميد معالي شارك مع نادي الزمالك في 260 دقيقة، خلال 9 مباريات».
وأشار إلى حجم التكلفة المالية للصفقة بالنسبة لدقائق مشاركة اللاعب، قائلًا: «لو خدت المليون و110 آلاف دولار دول ضربتهم بالمصري، هيطلع لك حوالي 56 أو 57 مليون جنيه».
واستكمل: «الراجل ده في الدقيقة كان بياخد 260 ألف جنيه، 260 ألف جنيه عبد الحميد معالي كلف الزمالك في الدقيقة، ولا تفتكره ولا فاكر له بصمة ولا تشوفه».
وعن أسباب الأزمة، قال كريم رمزي: «هنرجع للأصل، إن أخطاء كثيرة وقع فيها نادي الزمالك في كثير من التعاقدات».
وكشف تفاصيل تواصله مع نادي الزمالك بشأن الخطاب الخاص بالقضية، قائلًا: «لما سألت نادي الزمالك النهارده: العقوبة بتاعت عبد الحميد معالي وإيه حكاية الخطاب اللي كان بالفرنسي وأنتم طلبتم اللي هو بالإنجليزي؟ قال: ده طبيعي، ولكن إحنا مالناش دعوة».
وأضاف: «فأنا سألت: مين اللي ليه دعوة؟ قال لك: اللي كان مسؤول عن كرة القدم وقتها».
وتابع: «مقالليش الاسم بصراحة، أنا اللي بفسر: مين اللي كان مسؤول عن كرة القدم وقتها؟ جون إدوارد، المدير الرياضي».
وأردف: «قال لك إن الخلاف اللي حصل، أصل هو طلب واتأخروا والعقوبة زادت وكل الكلام ده، الناس اللي موجودة دلوقتي بتدير كرة القدم في نادي الزمالك تقول لك: مش إحنا، ده كان جون إدوارد».
وأوضح موقفه من تحميل المسؤولية، قائلًا: «بس أنا رأيي إن نادي الزمالك مش هينفع أقول ده أو ده الخطأ، لو في خطأ فكل نادي الزمالك».
واختتم: «فالزمالك قدم الاستئناف وينتظر تخفيض العقوبة، والزمالك قال لنا إن العقوبة بقالها فترة تم إصدارها، واللي ظهر النهارده على موقع الفيفا كانت حيثيات الحكم، لكن إحنا عارفين الحكم ده».
وأضاف: «حتى أنتم كإعلاميين كنتوا نشرتوا الحكم وقتها، اللي هو 611 ألف دولار لصالح عبد الحميد معالي».