مهيب عبد الهادي يكشف موقف محمد صلاح ويطالب اتحاد الكرة بخطة للمستقبل

تحدث الإعلامي مهيب عبد الهادي عن استعدادات منتخب مصر خلال الفترة المقبلة، وموقف محمد صلاح من المباراة الودية أمام جنوب إفريقيا، مشددًا على ضرورة وضع خطة واضحة لتجهيز الفراعنة لبطولتي كأس أمم إفريقيا وكأس العالم.

لماذا تغيرت القيمة السوقية لمحمد صلاح؟

وقال مهيب عبد الهادي خلال تصريحات عبر برنامج «اللعيب» المذاع على قناة «MBC مصر»: «منتخب مصر قفل صفحة التصفيات مؤقتًا بأربع نقاط، من تعادل مع أنجولا وفوز على جنوب السودان».

وأضاف: «عندنا مباراة مهمة رغم أنها ودية ضد جنوب إفريقيا، خصوصًا أن آخر مباراة اتلعبت في القاهرة خسرنا 1-0 في أمم إفريقيا 2019، لكن آخر مباراة لعبها كابتن حسام حسن أمام جنوب إفريقيا في المغرب كسبناها 1-0».

وعن موقف محمد صلاح من المباراة، أوضح: «هل صلاح هيشارك؟ محمد صلاح مسافر إنجلترا وهيطلع على تركيا، ومش هيلعب مباراة جنوب إفريقيا، زي ما منعم مش هيلعب ورجع ناديه».

وتابع: «وقلنا إن كابتن حسام حسن فتح صفحة جديدة مع كل اللاعبين، المعسكر الجاي محمد الشناوي وأحمد الشناوي وناصر ماهر وأي حد ممكن ينضم لو مناسب فنيًا، والموضوع خلص».

وأردف: «ليه بقى الكلام الكتير واللي بيحصل ده؟ غالبًا في فراغ إعلامي، محدش لاقي حاجة يقولها».

وواصل: «تخيلوا لو مكنش موضوع تصريح الشناوي ده حصل، كانوا هيتكلموا في إيه؟».

وطالب مهيب عبد الهادي بالتركيز على المرحلة المقبلة، قائلًا: «يا جماعة محدش سأل ولا اتكلم إحنا هنعمل إيه الفترة الجاية؟ هنبدأ نعد نفسنا إزاي لأمم إفريقيا وكأس العالم الجاي؟».

وأتم: «إحنا عندنا لعيبة كتيرة مش هتكون موجودة في كأس العالم الجاي علشان السن، طيب اتحاد الكرة اللي موجود ده إيه خطته في اللي جاي؟ عملتوا إيه؟ خططتوا لإيه؟».