ريهام سعيد تكشف التفاصيل الكاملة لحادث دهس هدير بائعة الشاي
كشفت الإعلامية ريهام سعيد عن التفاصيل الكاملة، الخاص بحادث دهس هدير بائعة الشاي بحدائق الأهرام، خلال بث مباشر عبر صفحتها الرسمية على موقع التواصل الإجتماعي فيسبوك، وذلك عقب انتهاء حلقة برنامجها صبايا الخير.
حادث دهس هدير بائعة الشاي بحدائق الأهرام
وقالت ريهام سعيد خلال البث : "الحلقة كانت الساعة ٩ ووزارة الداخلية نزلت بيان معتمدة على أقوال الولد في القسم، لازم لما نغطي حاجة نغطيها بشكل رسمي، وبيان الداخلية قال أنه هو اللي كان سايق، بناء على شهاداتهم، كان معانا على الهوا كنزي حافظ زميلة هدير وقالت أن هدير عندها ٢٧ سنة وكانت مخطوبة بقالها ٣ شهور، ودي عربية قهوة بتاعت واحد مش بتاعت هدير، وبتاخد في الساعة ٢٥ج بتفضل واقفة من ٨ص ل٨م، وهما واقفين في طريق بطئ، طبيعي تبقى في الطريق لأنها عربية وبيفتحوا شنطتها ويشتغلوا عليها، زي اي عربية بنشتري منها، ده مش معناه أن أحنا نشيلهم، العربية بتاعت والد الولد، شهود العيان شهدوا أن البنت اللي كانت سايقة، ونزلت بتضحك، وباباها وصل المكان وقال كل حاجة هتتحل.
وأضافت ريهام سعيد، "مشفقة على والدة البنت ووالدة الولد زعلانة منهم ولكن مشفقة عليهم، هل حضرتك كنتي تعرفي ان بنتك نازلة تركب عربية مع زميلها حتى لو عرفاه وبتتعلم السواقة، هل ١٥ سنة مبقوش اطفال في زماننا ده، لما اتعرضوا على النيابة اعترفوا كلهم أن البنت كانت سايقة والولد كان بيعلمها السواقة، اللي بيتعلم السواقة بيمشوا على سرعة ١٠ بس شهادة كنزي أن العربية كانت على سرعة عالية، ممكن يكون ضحك البنت يكون من وهل الصدمة، وفي القانون ممكن أبوهم يتحبس عشان أنتوا مسئولين على ولادكم، أنا بصلح اللي أنا قولته بناء على بيان النيابة".
وأضافت ريهام سعيد: “ما تركبوش عربيات.. اللي مش قد يركب عربيات ما يركبش عربيات، والله أصل هو مش بالفلوس ومش بالقدرة ومش بكده، دي أخلاق في الآخر، ما فيش حد عنده أخلاق يعمل كده، ما فيش حد عنده ضمير”.