رمى جثته داخل أتوبيس..تأييد السجن المؤبد لقاتل صديقه وتقطيع جثته بصاروخ
قضت محكمة النقض، بتأييد الحكم الصادر بمعاقبة مدرب كرة القدم المتهم بقتل صديقه وتقطيع جثته بصاروخ كهربائى داخل شقته فى منطقة عابدين بالسجن المؤبد.
وكانت محكمة جنايات القاهرة برئاسة المستشار وائل زهران، وعضوية المستشارين جابر الجزار ومحمود رشدان وعبدالله سلام، قضت سابقا، بمعاقبة المتهم بقتل صديقه وتقطيع جثته بمنشار كهربائى بالسجن المؤبد.
وأدلى مدرب كرة القدم المتهم باعترافات تفصيلية خلال تحقيقات النيابة فى القضية رقم 279 لسنة 2023 جنايات عابدين .
وقال المتهم: "اللى حصل أن يوم السبت 14 يناير 2023، جالى جارى أشرف "المجنى عليه" ونده عليا من تحت بيتى وطلب يطلع عشان اديله أكل وأنا طلعته عشان أعمله أكل لأنه غلبان ولما طلع عندى طلب منى اعمله كوباية شاى قبل الأكل فأنا دخلت المطبخ عشان اعمله أكل وخرجت فى الصالة لقيته ماسك الشنطة بتاعتى وأول ما شافنى على الكرسى اللى فى الصالة، فأنا قولتله أنت بتعمل إيه بالشنطة بتاعتى فقالى بيدور على السجاير والولاعة فأنا دورت فى الشنطة ولقيت 300 جنيه ناقصين، ولما قفشته لقيت معاه الفلوس فى جيب قميصه".
وأضاف المتهم فى التحقيقات: "روحت ضربته فى وشه وفى رأسه فهو داخ ووقع من الضربة على طرف الطرابيزة اللى فى الصالة ونزل دم من رأسه، وفضلت حوالى 10 دقائق لغاية ما تأكدت أنه مات، وبعد كدة فكرت إزاى اتخلص من الجثة، فجت فى دماغى فكرة أنى أجيب صاروخ كهربائى من عند جارى عنده محل، فروحتله الورشة وخدت منه الصاورخ وعلمنى إزاى اشغله".
وتابع المتهم: "رجعت البيت تانى وشغلت الصاروخ وقطعت جثه أشرف وبدأت بالذراع الأيمن وبعد كدة ذراعه الشمال وبعد كده رجله اليمين قطعتها على أربع حتت ورجله الشمال على أربع حتت، وبعد كده فصلت رأسه عن جسمه وحطيتها في حلة وغليت المياه عليها عشان تتطرى واعرف اكسرها، وبعد كده حطيت أجزاء الرجلين في سبع شنط والجزء اللى فوق لفيته في كرتونه وحطيته تحت سريرى اللى في اوضتى، وكمان حطيت الرأس في شنطة في نفس المكان تحت السرير وحطيت الشنط في الدولاب ورشيت عليهم ديتول وكلور عشان الريحة، ونضفت الشقة.
وأكمل المتهم في التحقيقات: "تانى يوم نزلت بـ3 شنط فيهم الذراع الشمال وأجزاء الرجل الشمال وطلعت بره البيت ورميت شنطة في شارع بورسعيد في السيدة زينب والشنطة التانية رميتها جنب مدرسة والشنطة الثالثة سيبتها في اتوبيس نقل عام وبعد كدة رجعت على البيت، وتخلصت من باقى الشنط في نفس الأماكن وفى شنطة كان فيها لبس أشرف رميتها في عربية زبالة".
وكانت أجهزة الأمن ألقت القبض على المتهم واعترف تفصليا بارتكابه للجريمة، ومثل جريمته أمام جهات التحقيق وقررت النيابة حبسه 4 أيام على ذمة التحقيقات.
