ياسمين نيازي تكشف لـ "الوفد" سبب منشورها الأخير.. ماقصدتش أحمد العوضي

كشفت المطربة ياسمين نيازي سبب منشورها الأخير الذي أثار جدلًا واسعًا عبر مواقع التواصل الاجتماعي، بعدما ربط عدد من المتابعين بينه وبين آخر تصريحات الفنان أحمد العوضي.

وأكدت ياسمين نيازي في تصريح خاص لـ “الوفد” أنها لا تقصد أحمد العوضي على الإطلاق، قائلة: "أكيد لا، أنا ماقصدتش أحمد العوضي ولا أي فنان، أنا كنت بتكلم عن اتجاه الصحافة اللي بقى بيركز بس على الفنان اللي حواليه جدل".

وأضافت نيازي : "وياريت يكون الجدل مرتبط بالشغل والنجاح الفني، مش بمشاكل أو حاجات خارج سياق اللي بيقدمه الفنان"، مشددة على احترامها الكامل لأحمد العوضي وغيره من الفنانين، قائلة: «أحمد العوضي فنان محترم وعلى راسي، وغيرُه كمان".

وأعربت ياسمين نيازي عن استيائها من ابتعاد بعض التغطيات الإعلامية عن دورها الحقيقي، متابعة: “حاجة تزعل إن الفنان يبقى شايف إن الصحافة رايحة للاتجاه ده .. فين الصحافة الفنية اللي بجد؟ اللي كانت دايمًا بتدعم الفنانين بأخبارهم وشغلهم”.

واختتمت تصريحها بالتأكيد على أن منشورها لم يكن موجهًا لأي شخص بعينه، قائلة: "أنا أكيد ماقصدتش أي حد ومليش دعوة بحد، أنا بس استغربت أكتر من موقف للصحافة والبرامج لا أكتر ولا أقل".

وكان قد سبب منشور الفنانة ياسمين نيازي الأخير جدلًا واسعًا على مواقع التواصل الاجتماعي بعدما عبرت فيه عن رؤيتها للتريند والشهرة والإعلام.

وكتبت ياسمين في منشورها: “جماعة فكرو معايا ف اشاعة تطلعني تريند او كلام ان انا اجمد واحدة ف الكوكب واجمد من شيرين وانغام واعلي سعر وكدا وزودو بقا بحاجه تشطشط الموضوع فضيحة عشان كل الناس تكتب عني ويبقو بيجرو ورايا عشان ارضا اعمل حوارات واطلع برامج ب ارقام فلكية.. ومدام اسعاد يونس تستضيفني هي ومني الشاذلي  وعمرو اديب وكل البرامج المهمه فشخ دي فكروووو بصوت عالي عشان يسمعونا ".
وأضافت: "أصل المحترم اللي بيقول على نفسه فنان، اللي بيشتغل بس وطالع عينه على البلد دي محدش بيبص ناحيته، أصله مش ترند فضائح ومشاكل… تفوو على دا زمن".