لتسجيله في "اليونسكو".. أسرة عبد الحليم حافظ تعلن فتح زيارة منزله بهذا الموعد
كشفت أسرة العندليب عبد الحليم حافظ، عن تدشين موقع جديد لمشاهدة منزله ومقتنياته، حيث تسعى أسرته إلى توثيق المنزل في منظمة اليونسكو كأحد أبرز بيوت نجوم الفن، وذلك خلال منشور عبر الصفحة الرسمية لمنزل العندليب على موقع التواصل الاجتماعي الأشهر “فيس بوك”.
فتح زيارة منزل عبد الحليم حافظ مجددًا بدءًا من 30 مارس المقبل في ذكرى وفاته
وكتبت أسرة عبد الحليم حافظ: "بعد غيبة طويلة رجعنالكم بأخبار حلوة، عارفين إننا وحشناكم، وإن فترة قفل "صفحة بيت العندليب" كانت صعبة على كل مُحبيه.. بنعتذرلكم عن الانتظار، وعن أي وقت كنتم عايزين تزوروا فيه البيت ومكانش متاح فيه الحجز، بس كان لازم نغيب شوية عشان نرجع لكم بحاجة تليق بقيمة عبد الحليم حافظ وتليق بيكم".
وأضافت": “كان صوت عبد الحليم حافظ أكثر من مجرد غناء، كان نبض بيت مصري، وذاكرة جيل كامل ومستقبل جيل قادم، صوته اتربّى معانا، وكلماته لسه بتزور قلوبنا كل يوم، ولأن تراثه أمانة، أسرة حليم اشتغلوا بحب وشغف عشان يحافظوا على بيته ويخلوه متاح لكل الناس”.
واستكملت: “النهاردة وبكل فخر بنقدّم لكم الصفحة الرسمية لمنزل حليم، الفترة اللي فاتت كانت الزيارات بتتحجز عن طريق التليفون أو رسايل الصفحة، وده كان متعب لكتير من الزوار وللأسرة أيضا، علشان كده قررنا نسهّلها عليكم”.
وأردفت: “دلوقتي تقدر تحجز زيارتك بضغطة واحدة من خلال الموقع، لكن الموقع مش بس للحجز، دي هديّة منّا ليكم عشان نعيش سوا إرث العندليب، بمجرد ما تدخل الموقع، فكأنك دخلت بيته الحقيقي؛ كل ركن فيه شايل ذكرى، وكل تفصيلة بتحكي حكاية، هتلاقي فيه رحلة كاملة لحياة عبدالحليم من طفولته، لصعوباته، لشغفه اللي ما انتهاش، ولكل محطة فنية صنعت مجده، وضفنالكم كمان معرض صور للعندليب وبيته، هيخليك تحس بروح المكان حتى قبل ما تزوره فعليًا”.
وواصلت: "مهمة خاصة جدًا مشروع اليونسكو، عشان نقدر نسجل بيت عبد الحليم حافظ في منظمة اليونسكو كأحد بيوت رموز الفن، محتاجين دعمكم بجد!، بعد زيارتكم، تقييمكم وتعليقكم على "Google Maps" (خرائط جوجل) هو السند الحقيقي لينا. كل "ريفيو" إيجابي بيقربنا خطوة إننا نخلّد اسم العندليب عالميًا.. ونحب نفكّركم إن البيت هيفتح أبوابه للزيارة يوم 30 مارس، في ذكرى وفاة العندليب، الحجز حصري من خلال الموقع فقط، الزيارة مجانية بالكامل، وهدفنا إن كل محبّ للفن يعيش التجربة دي بنفسه، قبل الحجز".
واختتمت أسرة العندليب المنشور بقولهم: “من فضلكم اقرأوا شروط وأحكام الزيارة علشان نحافظ مع بعض على المكان متاح وآمن للجميع، وفي ختام الكلام، بنهديكم رابط موقع بيت عبد الحليم حافظ.. الموقع اللي بيحفظ تراث أيقونة الزمن الجميل.. من دلوقتي الموقع مفتوح لاستقبال الزوّار، أما الزيارات الفعلية فهنبدأ نستقبلكم من يوم 30 مارس”.