هل يغفر الله للمنتحر.. وهل الانتحار كفر؟

هل يغفر الله للمنتحر.. وهل الانتحار كفر؟ سؤال يسأل فيه الكثير من الناس فأجاب الدكتور محمد العشماوي  من علماء الازهر الشريف وقال أولا .. الانتحار حالة يأس بتنتاب الإنسان .. في لحظة ضعف .. بيغذيها الشيطان .. وينفخ فيها .. ويغيب العقل تماما .. لحد ما الإنسان ينهي حياته بإيديه .. ظنا منه إنه هيرتاح من المعاناة .. أيا كانت .. مادية أو نفسية .. والحقيقة إنه ما بيرتحش ..

ثانيا .. كل إنسان عرضة للانتحار .. حتى الإنسان المتدين .. لأنه مرتبط بلحظات ضعف الإنسان .. والإنسان أصلا مخلوق من ضعف .. لكن بالاستقراء تبين أن الناس اللي إيمانهم قوي .. ولهم صلة بالله .. وارتباط بالعبادة .. والقرآن .. والذكر .. والمساجد .. وحب الصالحين .. بيبقى عندهم رضا وسكينة وطمأنينة .. بتهون عليهم الصعاب .. علشان كده دايما بننصح الناس بالأمور دي .. بخلاف الناس اللي حياتهم كلها مادة في مادة .. بييجي عليهم وقت .. الروح بتتخنق خالص .. بتبقى عاوزة تطلع من البدن .. لأن ملهاش حاجة تغذيها .. من الأمور الإيمانية اللي ذكرناها .. فبيتخلصوا من حياتهم بالانتحار ..

ثالثا .. اتنين من الناس .. أسرار الناس عندهم .. رجل الدين .. والطبيب النفسي .. ودا بيأثر غالبا على حالتهم النفسية .. أنا شخصيا من كتر ما بيتعرض عليا من مشاكل واستفتاءات .. شعر راسي شاب قبل الأوان .. ووقع من كتر الهم .. لأن أنا من النوع اللي بيحمل هموم الناس .. لدرجة برجع أحيانا البيت مغموم .. ونفسيتي تعبانة .. فأولادي يسألوني انت كنت كويس .. ايه اللي جرى .. أقولهم مشاكل الناس .. وكان ده حال سيدنا الشيخ عبد السلام أبو الفضل .. كنت ادخل عليه أحيانا ألاقيه في حالة قبض شديد .. ما بيتكلمش .. ولا حتى بيرحب .. وبعد شوية ألاقيه يحكيلي ان حد كان عنده وحكاله حاجة .. نكدت عليه .. وخليته في حالة قبض .. وكانت مشاكل والله لا يصدقها عقل .. كان أحيانا بيذكرها في كتبه .. وأحيانا على المنبر .. أو في الدرس .. ولما جربت الحالة دي عذرته .. مشاكل الناس النهاردة شيء فوق تصور العقول .. شيء ملوش مثيل .. لا شرع .. ولا عقل .. ولا منطق .. ولا توقع ..

وبفكر ما عنتش أستقبل مشاكل الناس .. ولا فتاواهم .. لأن بصراحة بقيت بتعب جدا .. هما بيرتاحوا بالفضفضة .. وأنا اللي أفضل تعبان .. وحامل الهم .. وفعلا أنا مبردش على معظم الرسايل والمكالمات بقالي فترة ..

رابعا .. المرض النفسي مش بعيد عن حد .. دا نوع من البلاء .. والبلاء ما بيفرقش .. فممكن إنسان لا تتوقع إنه يكون مريض نفسي .. وتلاقيه مريض نفسي .. لأن الأمراض النفسية المعاصرة من نوع معقد وغامض جدا .. وأكتر الناس لما تقرب منهم .. تحس ان عندهم حاجة نفسية .. ربنا يكون في عون الناس والله .. ويرحمنا ويرحمهم برحمته الواسعة .. ويطبطب علينا وعليهم بإيده الحنونة الكريمة ..

واختم كلامي بتكرار النصيحة .. لنفسي ولكل المسلمين .. خليكو مع ربنا .. قربوا من ربنا .. مفيش أحن منه .. ولو ضاقت عليك نفسك أو الدنيا .. قول يا رب .. بإذن الله تهون .. والفرج بييجي أكيد .. بس خلي عندك صبر .. الصبر مفتاح الفرج .. وكل شيء بأوان ..