كيشو: في مصر أبطال بلا دعم.. و"مفيش حياة كريمة" رغم رفعنا اسم البلد عالميا
أكد البطل الأولمبي محمد إبراهيم كيشو، صاحب برونزية أولمبياد طوكيو 2021، أنه رغم تتويجه بـ 5 بطولات عالم و13 بطولة أفريقية في المصارعة، إلا أنه يشعر بغياب خطة واضحة أو دعم مستمر من المؤسسات الرياضية في مصر.
وقال كيشو خلال مداخلة هاتفية ببرنامج "حديث القاهرة" عبر شاشة القاهرة والناس: "إحنا بنتعب وبنحقق بطولات، لكن مفيش حد بيكمل معانا الطريق. مفيش خطة حقيقية لتطوير الأبطال أو تحسين أوضاعهم بعد الإنجاز".
وأضاف: "بعد الميدالية الأولمبية محدش ساعدني. لا عندي مرتب ثابت من الاتحاد، ولا دعم من وزارة الرياضة، وكل مصاريفي بتيجي من الرعاة. إحنا أبطال مصر ورفعنا اسمها في العالم، لكن بنواجه التجاهل. كله وعود ومسكنات".
"مفيش حياة كريمة للأبطال"
أوضح كيشو أن الرياضيين في مصر يتحملون نتائج وأخطاء الإدارات الرياضية، مؤكدًا أن الدعم المادي والمعنوي غير كافٍ لتطوير مستواهم، قائلًا: "اتكلمت أكتر من مرة عن أوضاعي، والرد دايمًا بيكون إن مفيش ميزانية. مفيش حياة كريمة للأبطال رغم اللي بنحققه لمصر".
حقيقة اللعب باسم أمريكا
وعلق البطل الأولمبي على ما تردد بشأن انتقاله للعب باسم الولايات المتحدة الأمريكية، قائلًا إن الإجراءات لم تكتمل حتى الآن، مؤكدًا: "أنا بقالي 12 سنة برفع علم مصر في الخارج، وصعب جدًا أرفع علم بلد تانية. بحب بلدي وعمري ما كنت أتمنى أكون في الموقف ده".
واختتم كيشو حديثه برسالة مؤثرة قال فيها: "نفسي أحس إن اللي بيحقق إنجاز في مصر يعيش بكرامة. الدعم مش رفاهية، ده أبسط حق للبطل اللي ضحّى بكل حاجة عشان اسم بلده".