شوارع سوهاج..«باركينج» مفتوح

 ظاهرة جديدة انتشرت بمحافظة سوهاج تحت مسمى زيادة دخل المحافظة وماهى إلا ضرر وتعطيل لمصالح السكان والأهالى وهى تأجير الشوارع الرئيسية والميادين والمناطق العامة والطرق لبعض الأشخاص لاستخدامها باركينج واماكن انتظار للسيارات بالإيجار بالمخالفة للقوانين التى تنظم عمل الجراجات وهى ظاهرة تضر بمصالح الأهالى وتتعارض مع طباع وعادات وتقاليد اهل سوهاج كما انها وسيلة تسهيل للبعض لاحتكار واحتلال أماكن تحت مسمى انهم مستأجرون من المحافظة.

وتناول رواد مواقع التواصل الاجتماعى بسوهاج موضوع تأجير الشوارع والميادين من قبل الوحدات المحلية لبعض الشباب والسيطرة على هذه الأماكن وتأجيرها للمواطنين على أنها جراج أو باركينج للسيارات، فهل أصبح الشغل الشاغل للعاملين بالمحليات العمل على زيادة الموارد المادية للمحافظة على حساب راحة المواطن وتيسير أموره؟ القانون نفسه يُلزم المحافظة تحديد مساحة الجراج بدقة وبدايته ونهايته وعدد الأماكن المخصصة للركن ولكن ما يحدث مهزلة حيث تم السيطرة على شوارع عامة وميادين بأكملها والاستيلاء عليها عنوة من ساكنيها ومنعهم من ركن سياراتهم فيها وإجبارهم على دفع إتاوات «حكومية» لركن سياراتهم الخاصة تحت منازلهم وأمام محلات عملهم.

قال محمد صديق أحد سكان حى شرق إن الحى يقول لكم من لا يلتزم بدفع 15 جنيها لركن سيارته لمدة ساعة سوف يتخذ ضده الإجراءات القانونية.. أن تنزل لشراء جورنال بـ3 جنيهات ترجع تلاقى أحدهم ممسكا إيصالات يقف أمام سيارتك يقول: ادفع 15 جنيها ولو ساكن فى عمارة فى الميدان ستجد شخصا كل ما ترجع بيتك «يعد عليك» لحد ما تدفع مرتبك فتدفع بالشهر «اكرملك» وإلا لن تركن سيارتك أسفل منزلك فى الشارع العمومى الذى تدفع عليه ضرائب وترخيصا غير لما تدفع مرة أخرى رسوم باركينج.. عموما لو عندنا نواب حقيقيون مش ديكور كان الامر اختلف.

وقال عبدالله خليل بالنسبة لتأجير ميدان الشبان وتحويله لباركينج ووضع لافتة مكتوب فيها القانون ١٥٠ لسنة ٢٠٢٠ بند ٧ صفحة ٥ يقول تم الاتفاق على تأجير الميدان وعلى الشركة المنفذة «تركيب كاميرات ولبس زى موحد وتنفيذ الحماية المدنية وتحديد لمكان الباركينج وعدد السيارات ووجود لوحات إرشادية ولوحة بالتسعيرة وتكون معتمدة من الحى» وكل هذا لم يتم سوى ان هؤلاء الشباب نزلوا على الميدان بالبراشوت قائلين استأجرنا الميدان ومعنا عقد واشتغلوا لم فلوس بإيصالات وهمية تحت مرأى ومسمع العاملين بالحى والموضوع يحتاج تحقيقا فوريا من الرقابة الإدارية وللعلم لا يوجد بند من قانون ١٥٠ لسنة ٢٠٢٠ قول أن هناك عقوبة ضد عدم دفع رسوم لانتظار السيارات وللأسف الناس لا تعرف القانون وهؤلاء الشباب يستغلون عدم معرفة الناس بالقانون.

وتناول رواد السوشيال ميديا أنه فى خلال الأشهر السابقة تحولت محافظة سوهاج إلى باركينج كبير بمقابل مادى مثل: «باركينج السوق الحضرى بالشرق وباركينج أسفل كوبرى الثقافة وباركينج أسفل كوبرى العروبة وباركينج ميدان الشبان وباركينج القاعات بطريق نيدة واتاوة السايس أمام محطة سكة حديد سوهاج وأتاوة السايس بشارع البحر وإتاوة السايس بمنطقة العارف.

وقال رائف حشمت هو فى إيه؟ هل وصلت ديون مصر لدرجة أنهم عايزين يسددوها عن طريق أى شىء حتى ولو عن طريق إرهاق المواطن وصلت لدرجة تأجير الشوارع وأمام المنازل والميادين العامة وفرض الاتاوات وضع لا يقبله أحد المناطق السكنية والميادين التى تعد متنفسا لأهالى مدينة سوهاج نشوف بدفع رسوم لركن سياراتنا أمام منازلنا بالساعة رغم عدم وجود مصالح حكومية ولا اسواق بهذه الأماكن. 

والسكان بيدفعوا ايجار الشقق بالعافية والآن كمان عاوزينهم يدفعوا ارضية لوقوف سياراتهم.

وأضاف نرجو من صناع القرار بالمحافظة إعادة النظر فى مثل هذه القرارات لأنه سوف يترتب عليها مشاكل كثيرة ويجب مراعاة الابعاد الاجتماعية والاقتصادية وأن زيادة موارد المحافظة لا تكون بزيادة أعباء المواطن السوهاجى.

 وطلب احد السكان من الشباب الذين استولوا على ميدان الشبان أن يستأجروا مكانا مخصصا كجراج، سوف ندعمكم وكل شخص يريد ركن سيارته فى جراج نحضره إليك وهذا سيكون برغبته ورضاه وعنده المقدرة على الدفع وانتم وقتها سوف تكونوا مبسوطين لكن جراج فى الشارع وامام المنازل والناس راكنة سيارتها من سنين امام منازلهم ويقوم الحى بتأجير الميدان مشاع ويصدركم فى المشهد فهذا هو الغلط لأن فعلا نص القانون ١٥٠ لسنة ٢٠٢٠ ليس المقصود منه الأماكن السكنية والقرار تم تنفيذه بالخطأ ولم يتم تنفيذ شرط من شروط هذا القانون. 

١–لم يتم تحديد مكان الجراج بالظبط «ابعاده واماكنه» فى الميدان كله ولا اجزاء محددة 

٢–عدم وجود كاميرات مراقبة 

٣–عدم وجود زى (لبس) موحد 

٤–عدم وجود حماية مدنية 

٥–ولا توجد لوحات إرشادية 

٦ -ولا توجد تسعيرة واضحة وصريحة معتمدة من الحي 

هذه هى شروط القانون فين الكلام دا على ارض الواقع!! ولا شىء غير فجأة وبدون سابق إنذار مطلوب مننا ندفع وخلاص طيب فين الخدمة والتأمين اللى انا حدفع عليها؟! 

وقال عادل إسحق ان هذا تفكير عقيم وسيئ لأن الشارع ده من حقى انا كمواطن انا اللى دافع تمن الرصف وتمن البنية اللى اتعملت من الضرايب اللى بتتخصم منى ومن الاستقطاعات اللى بتيجى على فواتير الكهرباء والمياه يبقى إزاى تحاسبنى على استخدامه المفروض احنا نسأل ليه الشوارع متكسرة وليه العشوائية وليه الزبالة فى كل مكان ونحاسب المسئولين لو حد بيفكر فى البلد فهناك حلول كتير منها استغلال ارض السينما اللى اتهدت اعمل عليها مول كبير والدور الأرضى اعمله جراج أو شوف حتة ارض بدل ما هى مقلب زبالة نضفها واعملها جراج افتحوا المصانع المغلقة وشغلوا الشباب ده لو عايزين تعلموا موارد المحافظة. 

وقال عبدالعظيم جمال عقم فى التفكير والابتكار واستسهال فى جمع الأموال كجباية أو جزية مفروضة على المواطن تحت مسمى زيادة موارد المحافظة من جيوب الناس ايه الخدمة اللى التى تم تقديمها لى فى الشارع علشان ادفع عليها فلوس بالمنطق ده لو وقفت شوية مع واحد صاحبك من غير عربية هتدفع انتظار فى الشارع والمرة الجاية حضرتك ماشى مثلًا فى شارع البحر على رجليك هتدفع كارتة والمرة اللى بعدها حضرتك خدت كام نفس هواء فى الشارع هتدفع علشان تتنفس وكله يهون علشان تنمية موارد المحافظة.

وقال أحد العاملين بالباركينج بلاش كلام ملهوش اى لازمة وريتش على الفاضى ممكن الناس اللى زعلانة تتجمع وتروح للمحافظ وتقدم له شكوى أو ترسل شكوى على الخط الساخن التابع لرئاسة الوزراء لكن بلاش تتكلم عن ناس بتدفع ايجارات وعمالة ودافعين تأمين مبلغ وقدره علشان بس مشروع طرحته المحافظة قلنا ناكل منه عيش بالحلال ونزود دخل بيوتنا علشان عندنا اطفال مش كل شوية نلاقى ناس بتشوه فى صورتنا وتتكلم علينا احنا ناس وبشر زيكم مافيش اختلاف ومن الشعب وعندى مشاكل كتير قوى من ناحية البلد ونفسى اسيبها واسافر اعيش فى أى دولة تانى بسبب ظروف العيشة اصبحت صعبة وبدل ماتهاجمنى انا كشخص أو مشروع دافع فيه دم قلبى ويعلم ربنا جايب الفلوس دى إزاى ومنين وبعمل ايه علشان اعرف اكل عيش بالحلال روح هاجم القانون اللى عمل كدا مش انا، شعب سوهاج المحترم ناسى وأهلى كفاية كلام سلبى اتقوا الله لو ركزتوا 10 دقايق فى الموضوع هتلاقينى انا المجنى عليه مش جانى وبعدين انا مقولتش ان الساعه بـ15 جنيه زى ما بتقول أنا شغال بتعريفة حطاها ليا المحافظة ومقدرش اخالفها.