نضال الشافعي: رحيل زوجتي خطف حياتي مش نصي التاني بس
كشف الفنان نضال الشافعي للمرة الأولى عن تفاصيل أزمته مع فقدان زوجته الراحلة الفنانة هند علي، التي رحلت منذ 4 أشهر، وذلك خلال ظهوره ببرنامج “ورقة بيضا” مع الإعلامية يمنى بدراوي على قناة النهار.
وأشار الشافعي إلى أن غياب زوجته كان صدمة كبرى: “ماقدرتش أتعامل مع إحساس الفقد، مراتي ماكنتش مجرد زوجة، دي كانت صاحبة وصديقة، عرفتها من وهي في الصف الثاني الإعدادي، واتربطنا بقصة حب كبيرة”.
وتحدث عن لحظة وفاتها قائلاً: “رحلت بشكل غير متوقع، وده كان من أصعب ما يكون، أنا ما فقدتش نصي التاني بس، أنا فقدت حياة كاملة أي نجاح وصلت له كان بفضلها هي، لأنها ضحت بأحلامها وطموحاتها علشاني”.
وأوضح الشافعي أن أكثر ما يوجعه هو رحيلها المفاجئ: “الخناقة اللي هاعملها معاها أول ما أشوفها في العالم التاني إنها سابتني ومش ده اللي اتفقنا عليه. بس ماكانش عندي رفاهية الانكسار، وبعد 10 أيام من وفاتها أصريت أولادي يرجعوا المدرسة علشان الحياة تكمل”.
وأكد أن علاقته بزوجته لا تزال حاضرة رغم الفراق: “لسه بتكلم معاها وأتخانق معاها كأنها لسه موجودة، بس للأسف ما لحقتش توصيني بحاجة لأنها ماتت فجأة، وربنا يرحمها ويصبرنا على فراقها”.
وعن أولاده قال: “مش عايز حد فيهم يدخل المجال الفني رغم موهبتهم، أنا ضعيف قدامهم، وفخور جدًا باختيار أمهم اللي تعبت أوي في تربيتهم”.
أما عن بداياته الفنية فذكر: “أنا من القاهرة وأصلي من المنوفية، وده إداني فرصة أكون قريب من الناس. شخصية (فضل) في فيلم الجزيرة كانت مستوحاة من جار ليا في منطقة أبو قتادة بعد التخرج بـ3 سنين كنت قررت أعتزل، لكن لقائي بالمخرج خالد جلال غير حياتي، ومنعني من السفر”.
واسترجع الشافعي أصعب أزماته الصحية: “دخلت في خلاف في الشغل وحزنت جدًا لدرجة القولون انفجر، ودخلت في غيبوبة، والدكتور قالي إن حياتي كانت معجزة من ربنا”.
وفي ختام حديثه تحدث عن علاقته بالزعيم: “عادل إمام نجم عظيم، في (فرقة ناجي عطا الله) كان بيعاملنا كأننا أولاده، وهو سبب في نجومية فنانين كبار دلوقتي ،ومحمد إمام بالنسبة لي أخ وصديق دايم النصيحة”.