هتوحشنى أوى يا حبيبى.. طليقة المخرج سامح عبد العزيز تنعاه بكلمات مؤثرة

شاركت الفنانة داليا فرج، طليقة المخرج سامح عبد العزيز وأم بناته، منشور عبر صفحتها الرسمية بموقع فيسبوك ترثي من خلاله طليقها وتكشف عن مدى حزنها على رحيله  متمنية أن يكون خبر رحيله مجرد كابوس وليس حقيقة.

وكتبت داليا على صفحتها الشخصية قائلة: "اللى بينا حاجة مافيش غيرنا فاهمها، فاهمين تفاصيل بعض، وبنفهم بعض من نظرة، نتخانق بقى نزعل نحلف ما انكلم بعض تانى تقريبا ونص الصيام اللى بصومه رايح على الحلفان، وأول ما تكلمنى أنسى وأصالحك على طول عشان عارفة إن قلبك طيب، بيبى كبير وضخم وعشان اللى جوانا بتاعنا إحنا وبس".

وتابعت: "مش حاجة ممكن تفهموها أو تسموها، لينا تأثير قوى على بعض وفيه حته جوة كل واحد فينا للتانى خاصة ومختلفة، عشرة عمرى حبيبي أبو بناتي، رغم انك مشيت بس اللى مريحنى إن آخر 20 يوم كنا مع بعض كلنا على طول".

وأختتمت حديثها قائلة: "يا رب ما اكونش قصرت فى حقك، هتوحشنى أوى يا حبيبى يا غالى زى ما كنت بأقولك دايما انت الغالى وترد حبيبتى، مش مصدقة إنى باقولها.. ربنا يرحمك يا حبيبى ويسكنك فسيح جناته ويقدرني على المسئولية، نفسى أنام وأصحى ألاقى ده كابوس و مش حقيقى، بدرى أوى أوى يا حبيبى، لا إله إلا الله.. هتوحشنى يا موحه".

وفاة المخرج سامح عبد العزيز

وكان قد أعلن د. أشرف زكي نقيب المهن التمثيلية عن وفاة المخرج سامح عبد العزيز بعد صراع مع المرض، ونشر صورة الراحل سامح عبد العزيز، وأرفقها بتعليق: “البقاء لله المخرج الكبير سامح عبد العزيز”، مشيرًا إلى أن صلاة الجنازة ستقام بعد صباح العصر بمسجد الشرطة بمدينة الشيخ زايد.