استشارية أسرية: الاحترام خرسانة مسلحة لبناء الزواج الناجح

قالت سماح عبد الفتاح، الاستشارية الأسرية، إن من أهم الأمور التي تحتاجها العلاقات الزوجية في العصر الحديث، خاصة مع ضغوط الحياة وتسارع الإيقاع، هو الاحترام الحقيقي بكل أشكاله، مشددة على أن "الاحترام مش بس كلام، ده كمان نظرات وتصرفات وتفاصيل صغيرة بتبني أو تهدم".

أوضحت الاستشارية الأسرية، خلال حلقة برنامج "الرحلة"، المذاع على قناة الناس، اليوم الخميس،  أن احترام الحوار بين الزوجين، واحترام كل طرف لحوار الطرف الآخر مع الناس، يعكس رقي العلاقة، مضيفة: "ما ينفعش الزوج أو الزوجة يتكلموا بأسلوب فيه استهزاء أو تعليق ساخر قدام الناس، حتى لو بهزار، كل كلمة بتسيب أثر، وكل نظرة ممكن تخلّي ثقة تتكسر".

وشددت على أهمية الانتباه لـلغة الجسد والتواصل غير اللفظي داخل البيوت، قائلة: "نظرة حب أو طبطبة خفيفة على الكتف ممكن تشيل تعب يوم كامل، وفي المقابل، نظرة لحد تاني أو تجاهل في وقت احتياج، ممكن تخلّي الطرف التاني ينهار من جوه".

وأضافت أن من صور الاحترام الأساسية أيضًا الرد السريع أو الاعتذار عند الانشغال، لأن التجاهل يُفسر أحيانًا على أنه إهمال أو برود، موضحة: "البيوت أسرار فعلًا، ولو ما عرفناش نحافظ على خصوصيتنا، يبقى ما فيش معنى للبيت ولا للأسرة".
وأشارت إلى أن من أكثر ما يهدم العلاقة دون وعي هو عدم احترام عائلة الطرف الآخر، قائلة: "أهل زوجتك من أول والدتها لحد أبعد حد في عيلتها، كلهم ليهم تقدير. والعكس صحيح. احترم اللي زوجك بيحبه عشان تحترم قلبه".

وتابعت: "خدمة الزوجة لأهلك مش فرض، ولا إلزام، ده فضل منها تشكر عليه،  فلازم نساعدها، ونشجع ولادنا يساعدوها.. لأن الاحترام الحقيقي بيبان في المواقف الصغيرة".

قالت سماح عبد الفتاح، الاستشارية الأسرية، إن الاحترام بين الزوجين هو الأساس الحقيقي لأي علاقة زوجية مستقرة، وهو بمثابة "الخرسانة المسلحة اللي بتتشال عليها كل حاجة بعد كده، من مشكلات وهموم وضغوط الحياة".

وأكدت أن "أول سنة جواز هي سنة التأسيس، مش مجرد تجهيز شقة أو فرش بيت.. ده تأسيس لأسلوب حياة وطريقة تعامل لو ما تبنتش على احترام، فكل هزة بعد كده ممكن تخلخل العمود الرئيسي للعلاقة".
وشددت على أن: "الاحترام مش بس كلام.. ده نظرة، تصرف، طريقة رد، أسلوب طلب، تعبير عن الرفض أو حتى التعب.. وكل ده بيفرق جدًا في إحساس كل طرف بمكانته وتقديره عند شريكه".

وتابعت: "اللي فاكر إن الحب يغني عن الاحترام غلطان.. ممكن البيت يستمر من غير حب، لكن مستحيل يعيش من غير احترام.. الاحترام هو الضمان الوحيد إن العلاقة تستمر بكرامة وأمان نفسي".

وتحدثت عن أشكال الاحترام في الحياة الزوجية، ومنها: احترام المشاعر والاختلافات، واستخدام الكلمات المهذبة حتى في الخلاف، وتجنب التقليل أو الإهانة، حتى لو على سبيل المزاح، واحترام الأهل والعائلة الممتدة، والحفاظ على خصوصية البيت والأسرار، واحترام الوقت، والطاقة، والمواعيد، والتعامل اللائق قدام الأولاد والناس.

وأشارت إلى أن الانطباع الأول يدوم، محذرة من أن "لو العلاقة بدأت بتجاوزات وتعديات، واستمرت من غير ما الطرفين يتفقوا على حدود واضحة، فده بيبقى الطبيعي في العلاقة وبيبقى من الصعب جدًا تغييره بعد كده".

وتابعت: "كل تصرف فيه احترام بيبني رصيد في بنك العلاقة.. وكل تصرف فيه تقليل بيخصم من رصيد الأمان.. وإياك تفكر إن زوجتك أو جوزك هينسوا لحظة اتجرحوا فيها، حتى لو سامحوك.. لأن الاحترام مش رفاهية، الاحترام حياة".