"اوعى يكون ده السبب".. تامر حسني يلوم محمد سامي على قرار اعتزاله ويفاجئه برسالة خاصة
حرص المطرب تامر حسني على دعم المخرج محمد سامي بعد إعلانه اعتزال الدراما التليفزيونية، خوفًا من أن يكون شعوره بالإحباط هو السبب وراء قراره، خصوصًا بعد كم الانتقادات التي طالت أعماله الدرامية الأخيرة "إش إش" و"سيد الناس"، الذي يخوض بهما موسم دراما رمضان الحالي.
تامر حسني يرد على قرار اعتزال المخرج محمد سامي: “اوعى تكون عايز تبعد عشان أي إحباط”:
وعلق تامر حسني على منشور اعتزال المخرج محمد سامي قائلًأ: "اوعى تكون عايز تبعد عشان أي إحباط جايز يكون فعلًا في بعض المشاهد اللي الناس إنتقدتها وأنا شخصيًا إستغربتها شويه وقلت جوايا أنك مش محتاج تعملها أصلاً، لأن عندك الحقيقي والأهم، بس على رأيك الفنون جنون أحيانًا فكرة مجنونة تنال الإعجاب وفكرة لأ".
وتابع: "بس ده ميخليناش ننسى إنها بعض مشاهد مش بعض أعمال، لأنك بالفعل المخرج الوحيد في تاريخ مصر اللي مفشلش ولا مرة و يمكن الحظ محالفكش أوي في عمل ولا ٢ على مدار ١٤ سنة ودي حاجة مينفعش الجمهور ينساهالك".
كما حرص تامر حسني على تذكير الجمهور بأعمال المخرج محمد سامي التي حققت نحاجًا ضخمًا بدايًة من مسلسله "آدم"، قائلًا: “انت قدمت مسلسل ”آدم" اللي جمع كل المصريين وكل الوطن العربي يتفرجوا عليه زي ماتشات الكورة بسبب أنه أتكلم عن قضية تخص كل الوطن وكان بداية لصورة جديدة أول مرة كانت بتتقدم في مصر وبعدها “سبق الإصرار وحكاية حياة” اللي كانوا نقلة كبيرة في ديكورات الدراما المصرية وبعدين "الأسطورة و البرنس وجعفر العمدة" اللي حققوا نجاحات ساحقة وكانوا أعلى نسبة مشاهدات في الدراما بشكل عام، و بعدها “نعمة الأڤوكاتو وإش إش وسيد الناس” اللي برضو كل واحد فيهم يا أعلى مشاهدة يا تاني أعلى مشاهدة".
واستكمل نجم الجيل: "هزعل منك لو هتمشي محبط وأنت أنجح حد… الشجرة الخضراء الجميلة ساعات بيطلعلها ورق أصفر بسيط عادي بيتقص وبتفضل شجرة كبيرة وجميلة وده التطوير الطبيعي للبني آدم واللي بيمر بيه أي ناجح بيطور وعنده شخصية، بدليل مسلسلاتك بيتقال عليها مسلسلات محمد سامي وتركيز الناس معاك دليل على حبهم لأعمالك، ورغم إن بعضهم بينتقدوها بس متابعينها حرف حرف، و نقدهم ليك بيبقى على قد حجمك وهي دي ضريبة الناجحين الكبار".
وأردف: "سافر وكمل حلمك وأنت منتصر بتاريخك وأوعى تُحبط وأنا عارف إن محمد سامي اللي أكتشفته أنا وقدمته للصناعة وهو عنده ٢٧ سنة لا يمكن هيهتز ممكن يزعل يومين ويراجع نفسه في مشاهد أنا مبسوط منك أنك بمنتهى الشجاعة الأدبية أعتذرت على تقديمها خد راحة شوية وإرجع أقوى من الأول وأنا واثق من اللي هتسافر عشانه أنه قرار هيضيف نقلة كبيرة لمشوارك".
وأضاف: "أوعى تخلي الزعل من بعض المشاهد ينسيك أنت قدمت إيه للدراما، يا ريت قبل ما نقسو على سامي بالطريقه دي نفتكر هو أمتعنا سنين قد ايه بمسلسلاته وأنا ذكرتها كلها عشان لو حد ناسي أفكره وعشان لو هو محبط يجمد تاني".
واختتم تامر حسني رسالة دعمه للمخرج محمد سامي بالدعاء له بالنجاح والتوفيق خلال مشواره المقبل، قائلًا: "ربنا ينور طريقك وترجع أقوى وأقوى من أي وقت واثق فيك يا حبيبي، و أنا هفضل أخوك الكبير وفي ضهرك إن شاء الله طول العمر يا بطل".
اعتزال المخرج محمد سامي:
أعلن المخرج محمد سامي اعتزال الدراما التليفزيونية بعد رحلة طويلة في الإخراج دامت حوالي 15 عامًا، حقق خلالها نجاحات ضخمة مع نخبة مميزة من نجوم ونجمات الوسط الفني، وجاء ذلك خلال منشور عبر حسابه الشخصي بموقع التواصل الاجتماعي الأشهر "فيس بوك".
أشار المخرج محمد سامي إلى أن مسلسلي "إش إش" و"سيد الناس" اللذان يخوض بهما موسم دراما رمضان العام 2025، ستكون آخر أعماله التليفزيونية التي سيودع بها عالم المسلسلات، حيث قال: "وداعًا الدراما التلفزيونية.. السنة دي كانت آخر أعمالي التلفزيونية، واللي فيها بأودع المسلسلات، رحلة طويلة حولي ١٥ سنة، قدمت فيهم كل اللي قدرت عليه لإسعاد الجمهور العربي".
محمد سامي يعتزل الدراما التليفزيونية: الوحيد القادر علي الدوام هو الله وحده:
وأضاف: "حققت بفضل ربنا نجاحات مع نجوم كتير ومع شركات وقنوات كلها مهمة، وكان دايمًا الجمهور بيشجعني، سواء بردود الأفعال أو بتصويته ليا في الجوائز، وأي نجاح حققته كان بفضل ربنا والجمهور".
كما أوضح محمد سامي، أن المقربين منه كانوا على علم بقرار اعتزاله الإخراج التليفزيوني الذي فكر فيه منذ فترة، ولكنه كان مؤجلًا تنفيذه لحين الانتهاء من إلتزاماته الموقعة من الشركات والنجوم، حيث قال: "يمكن المقربين ليا عارفين إني واخد القرار ده من فترة وهو اعتزال الإخراج التلفزيوني ولكن كنت بانتهي من إلتزامات موقعة مع شركات ونجوم والحمد لله إنتهيت منها وكان آخرها ٢٠٢٥".
وتابع سامي: “معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي ومن الوقوع في فخ التكرار ودائرة المتوقع والملل، والوحيد القادر علي الدوام هو الله وحده، الحمد لله آخر عملين ليا ”إش إش وسيد الناس "حققا نجاحًا أنا سعيد بيه".
واستكمل: "كل يوم بلدي العظيمة مصر بتطلع صُناع جداد موهوبين ومثقفين ويقدروا يقدموا أفضل من اللي قبلهم، وهنفضل طول الوقت بنقدم أعمال مصرية يلتف حولها الجمهور العربي، بأشكر كل حد ساعدني في الرحلة وبأشكر كل زميل منافسته كانت دافعًا للتميز".
كما وجه المخرج محمد سامي رسالة اعتذار للجمهور عن أي مشهد قدمه أثناء رحلته الإخراجية، ولم يلق إستحسان الجمهور أو إعجابهم، قائلًا: "بأعتذر عن أي مشهد قدمته أثناء الرحلة ولم يلقَ إستحسان الجمهور أو إعجابهم، في الآخر الفنان دايمًا بيجرب والفنون جنون، زي ما بيقولوا".
في الوقت نفسه، أعلن محمد سامي أنه يستعد للسفر خارج مصر خلال الأيام المقبلة لمدة عامين لتعلم أشياء جديدة يود دراستها منذ زمن طويل، ولكنه كان يؤجلها، حيث قال: "أدعولي الفترة الجاية عندي سفر خارج مصر لفترة عامين بأتعلم فيهم حاجة جديدة بأدرسها، حاجة كان نفسي أتعلمها من زمان وأجلتها كتير لحد ما لقيت نفسي بأكبر وخايف يفوت العمر قبل ما أعمل حاجة نفسي فيها".
وأضاف: "مقتنع أن الشخص يقدر في أي وقت يقرر يوقف حاجة بيحبها عشان يعمل حاجة تانية بيحبها برضه وعايز يجربها بس محتاج عيلة تسانده علي اتخاذ قراره".
واختتم المخرج محمد سامي حديثه بتمني النجاح والتوفيق لكل زملايه، موجهًأ إليهم رسالة حب وشكر على المنافسة الجميلة التي صنعت أسماءهم جميعًا، حيث قال: "كل التوفيق لكل زمايلي وبأحبكم وبأشكركم علي سنين المنافسة الجميلة اللي عملت أسماءنا كلنا، وأتمنى لنفسي التوفيق في الخطوة الجديدة".
