بدرية طلبة تنهار بالبكاء: “أنا لا أنام وشائعة قتلي لزوجي دمرتني”
عبرت الفنانة بدرية طلبة، عن استياءها الشديد من التعليقات المسيئة على السوشيال ميديا التي اتهمتها بقتل زوجها عقب اعلان وفاته، قائلة: "معرفش اللي كتبت تعليق تقول أني قتلت جوزي وسافرت جابت الجراءة دي منين والمحامي حلف مش هيسبها لأن التعليق كان جزم بالقتل وليس سؤال".
وأوضحت بدرية طلبة، خلال حوارها ببرنامج "أسرار"، مع الاعلامية أميرة بدر، المذاع على قناة النهار، أنها قبل وفاته بوقت قليل باركت له لأنه كان معمول له مهرجان باسمه في الاسكندرية، مضيفة: "كنت سيباه كويس وكنت في فرنسا بعمل مسرحية وقبلها طلعت عملت عمره وهو متابعنا وكان كويس".
وانهارت بدرية طلبة في البكاء قائلة: "ربنا وحده وكيلي وأنا مش بنام وأنا لحد دلوقتي رافضة أنه توفى والناس ظالمه أوي ووحشه أوي، والناس طلقتنا وجوزتنا وبيقولوا سابته وهو عيان ومن الكلام ده خلوني راجعت الكاميرات بتاعت ممكن اكون سيبته تعبان ولقيته زي الفل"، ووجهت حديثها لمنتقديها: "أنتم هتكونوا أحن عليه مني ولو أنا طلقته في بنا عشرة هحزن عليه وبنتي الكبيرة اللي كانت هنا والأحفاد عرفوا من المدرسة وانهاروا".
وتابعت: "إزاي تيجوا على وحدة عايشه معاه أكثر من 30 سنة ويقولوا إني قتلته وأنا ملحقتش ادفنه وده اللي وجعني وقلت لهم صوروا فقالوا لي لا حرام وكنت عايزة اطبطب عليه ومحدش عارف كواليس حياتنا وأنا قررت دلوقتي إني اضايق اللي ضايقوني والناس دي بيضيقوني وجوزي كان عايز يموت وهما أخدوا منه المسرح وكان في مشاكل بينه وبين المكان اللي مأجر المكان وحصل مشاكل فمشي وساب كل حاجة".
ووجهت الاعلامية أميرة بدر، سؤال جرئ للفنانة بدرية طلبة، هل نجاحك أكثر من زوجك أثر على حياتك الزوجية لترد قائلة: "نجاحي وشهرتي عمل لي مشاكل في حياتي الزوجية وكنت بعوض ده في البيت إنى أكون ست أوي في البيت وانى أبين أنك راجل البيت ولك كل حقوقك في البيت".
وكشفت بدرية طلبة، قائلة: "كنت بقلع جوزي الجزمة واعمل له رجله عشان اعوض فرق النجاح وهو مش كان بيتفهم ده في كل الاوقات وفي أوقات حاجات كنت بعملها ومش واخده بالي منها لكن هو وقف جنبي في حياتي المهنية"، مؤكدا أن هناك ناس يتفننوا في وجع الآخرين.
وتابعت: "نفسيتي كانت مش متظبطة بعد وفاة جوزي وتعبانة حتى لو هو آخر 6 سنين من حياته كان بعيد شويه عشان المسرح ولكن دي عشرة عمر وهو كان متأثر بسبب المسرح".