سوسن بدر: بحب أربى الطفل من وهو صغير حتى 10 سنوات
قالت الفنانة سوسن بدر: "عمرى ما تخيلت نفسى أكون فى مهنة غير التمثيل، لكن الحاجة الوحيدة اللى كان ممكن أعملها لو مكنتش موهوبة فى التمثيل أكون مربية أطفال وليس مدرسة أطفال، وبحب ده حتى هذه اللحظة، علشان أعلمهم حاجات فى الحياة، وأعلمهم العيب والصح والأخلاق والفضيلة والقيم".
تصريحات سوسن بدر
وأضافت سوسن بدر، خلال حلوله ضيفة ببرنامج "الستات مايعرفوش يكدبوا" المذاع على قناة سى بى سى: "بحب أربى الطفل من وهو صغير حتى 10 سنوات، وأهم شئ الطريقة فى التربية، وتعليمه الحياة واحدة واحدة من غير ما أكرهه فيها، ومش من حق الطفل يغلط نفس الغلطة مرتين".
ولفتت سوسن بدر، إلى أن أصعب مشهد فى دور عايدة بمسلسل "أبو العروسة" هو لما عرفت "عايدة" أنها مصابة بسرطان الثدى وكان مشهد مؤلم وأنا لم أمر بالتجربة ولكن مريت بيها مع صحباتى، فالتجربة مؤلمة مع خضة الحكاية والست".
كما قالت الفنانة سوسن بدر: "مثلت فى برامج الأطفال بالإذاعة وأنا صغيرة، وبعدها مثلت وأنا كبيرة بعد فترة انقطاع، وكان أول شئ ليا هو مسلسل "أحلام الفتى الطائر" مع الزعيم عادل إمام و "حبيبى دائما" فى نفس الوقت و "هى والمستحيل" مع أنعام محمد على وصفاء أبو السعود".
وأضافت سوسن بدر : "أول عمل ليا كنت فى أولى معهد فى العمل الفنى "أحلام الفتى الطائر" ومكنتش متخيلة أكون بطلة أمام الاستاذ عادل إمام كنت مرعوبة وبترعش".
أوضحت سوسن بدر: "عادل إمام كان جميل وطيب ولما شافنى بترعش قالى متيجى نراجع ونقول المشهد تانى، ومع الفنان نور الشريف كانت نفس الحالة، وتجربة جميلة تعلمت منها، لافتة إلى أن هناك عدد من المخرجين والكتاب والمؤلفين والممثلين أثروا فيا وتعلمت منهم".
وقالت الفنانة سوسن بدر: "طول الوقت بقول تسلمى يا شدة، والجمهور العادى متخيل إن الفنان مش بنى آدم، وفى حتة تانية وحاجة مختلفة، لكن فى النهاية احنا بنى آدمين، بنمر بلحظات وجع وفقد بالموت والخيانة وساعات فلس، أو العمل وانا مجبرة".
وأضافت سوسن بدر، أن كل شئ فى الدنيا له ثمن، وكل حاجة نصيب ومكتوبة عند ربنا، وبسبب شغلى منكش متوفر ليا أنى أعمل بيت مستقر وعيلة وحياة زى أى ست فى أى مهنة تانية".
أكدت سوسن بدر:"كنت بحب شغلى بدرجة كبيرة، والتوازن ده يحتاج لطرف تانى مستوعب، وفضلت الفن على حساب حبى، لأنى مكنتش لاقية الطرف التانى اللى يكون متفهم طبيعة عملى".
تابعت سوسن بدر:" انا حابة شعرى وهو ابيض واللى بيحبنى بيحبنى لشخصى مش لشكلى، وحبيت نفسى من عشرين سنة حتى اليوم وراضية عنه".