هتروق وتحلّى!

 آلووووووه مين بيتكلم؟! أنا واحد من الشعب من الغلا.. بلاااالى!!

< وإيه تااانى؟! ومن تعويم الجنيه بعاااانى ومن سعر الدولار.. آآآه ياااانى!!

< قبل ما أسمعك كلامى.. الدولارسايق دلاله والجنيه زعلان على حاله!!

< بلاش اندهاااش.. أحكى يا صاحبى لسه التقيل ما جاااش!!

< هات آخرك يا صاحبى ويوم ما تجِيش.. الكلام عندى مفيش!!

< قولتك يا صاحبى الناهية..ودىِ خلصانة ومعاها حصانة!!

< لا مؤاخذة أسمع كلامك أصدقك! أحلفلك بسماهها وترابها؟!

< مِصدقك يا صاحبى من غير حِلفان.. وكلامك على راسى زين الكلام!!

< طمنى يا صاحبى الدنيا هتروووق وتحلى؟! متقلقش دِى هتبقى أحلى وأحلى!!

شواكيش ع التريند.

< لو قلت لك: أغنية «نورالعين» تصدرت التريند! أكيد هتقولى: اسمعها وارميها فى «بحر النغم»!

< لو قلت لك: أغنية تشتاق سماعها كل أسبوع! أكيد هتقولى: يا حبيبتى يا لحمة يا لحمة!

< لو قلت لك: شوفت مهزلة تكسير «أحجار» الهرم الأكبر؟! أكيد هتقولى: يا خوفى على «خوفو»!

< لو قلت لك: تذكرة حفل روبى وصلت 25 ألف جنيه! أكيد هتقولى: عشان نُرقص لازم نشخلِل!

< لو قلت لك: أعمل بنصيحة عمرو أديب «متشتغلش موظف»؟! أكيد هتقولى: أنسى يا عمرو!

< لو قلت لك: شيمة أهل «الفضاحيات»؟! أكيد هتقولى: الزمر والطبل ع الهوااااا.

< لو قلت لك : «الصُلح» بين المشاهير والضحايا؟! أكيد هتقولى: اللى تمامه ملايين مقدورعليه!

< لو قلت لك : بنستورد جبنة بـ120 مليون دولار! أكيد هتقولى: الحمد لله على الكاجو والكافيار!

< لو قلت لك : آه لو «تعبت» يا زهر!أكيد هتقولى: ده آخرة اللعب مع الدولار!

< لو قلت لك : الدولار«نابه» إيه؟! أكيد هتقولى: «نابه أزرق»!

< لو قلت لك: لما تنوى تشترى كسوة الشتاء! أكيد هتقولى: إشتغالة ع البالة!

< لو قلت لك: أقوى عروض «الجمعة البيضا»! أكيد هتقولى: كرتونة بيض تُركى وكتكوت هدية!

< لو قلت لك: حكمة اليوم فى أسواق العناء! أكيد هتقولى: الدولار لما يدلع يخلى الأسعار تولع!

< لو قلت لك: زادت أسعار زيوت الطعام هذا الأسبوع! أكيد هتقولى: علشان «زيتنا فى دقيقنا»!

< لو قلت لك: حال الغلابة فى أسواق الغلاء! أكيد هتقولى: «إن جاعوا زنوا وإن شبعوا غنوا»!

< لو قلت لك: طعم لقمة العيش فى فرن الغلاء! أكيد هتقولى: العيش مُر والعيشة مرار!

< لو قلت لك: الأكلة المفضلة للغلبان! أكيد هتقولى: الكرشة عند الغلبان لحمة!

< لو قلت لك: عبر عن نفسك يا غلبان! أكيد هتقولى: القناعة بتاعتنا بس ظروف «الفقر» منعتنا!

< لو قلت لك: أمنيتك فى سوق الخضار! أكيد هتقولى: كندوز اللحمة واحشنى بس «الغلا»حايشنى!

< لو قلت لك: الجنيه بعد التعويم راااح على فين؟! أكيد هتقولى: فى «مرمى لهيب الأسعار»!!

< لو قلت لك: غدوتك إيه بُكرة! أكيد هتقولى: تحابيش على مفيش!

< لو قلت لك: البيض التركى متوافر فى الأسواق! أكيد هتقولى: الفقراء هيقشروه والكبارهياكلوه!

< لو قلت لك: لسان حالنا؟! أكيد هتقولى: لا تعايرنى ولا أعايرك ده «الغلا» طايلنى وطايلك!

< لو قلت لك: ما شعورك عما يحدث فى حروب عالمنا اليوم! أكيد هتقولى: دايخ فى عالم بايخ!

< لو قلت لك: نصيحتك الأخيرة فى التريند؟! أكيد هتقولى: كبر اللحلوح وصغر النحنوح!