أحمد عز: الزعيم عادل إمام مُلهم وتعلمت كثيرًا من نور الشريف

 أقيمت، مذ قليل، ندوة نقاشية على هامش تكريم النجم أحمد عز، وذلك ضمن فعاليات مهرجان القاهرة السينمائي 2024، والمقرر أن تستمر حتى 22 نوفمبر الجاري.

 تحدث عز عن الزعيم عادل إمام، قائلًا: "ملهم وعلمني ازاي أعمل أفلام وأعمال فنية تعيش والزعيم عنده المعادلة دي وقابلته وقالي الالتزام والورق ده لو عايز تنجح ونصيحته هي اللي عايش بيها".

 كما تحدث “عز” عن النجم الراحل نور الشريف، قائلًا: “في مسجون ترانزيت كنت سعيدًا جدًا ان اسمي هيكون مع النجم الكبير نور الشريف وحقيقي اتعلمت منه الالتزام وانه دايمًا بيحضر في اللوكيشن قبل ما يحضر اي حد من الفريق وده مهم جدا لأي فنان”.

تكريم أحمد عز بحفل افتتاح مهرجان القاهرة السينمائي 2024

 كرَّم مهرجان القاهرة النجم أحمد عز بمنحه جائزة فاتن حمامة للتميز وقال: "من حوالي ٢٤ سنة خيروني بين أكمل في شغلي وبين بطولة أول فيلم سينمائي واخترت دخول مجال التمثيل من دون رغبة أهلي وأنا بصور كان مهرجان القاهرة هيشتغل وكنت مستني يجيلي دعوة لمهرجان القاهرة عشان أفرح أهلي ودخلت على الريد كاربت محدش عرفني وتلف الايام واجي اقف هنا واتكرم واخد جائزة اسم صاحبها لوحده جايزة ومن الوزير الثقافة ونجم النجوم اللي مفيش زيه حسين فهمي وللاسف التكريم جه وابويا وامي مش موجودين".

 وتابع أحمد عز: "التكريم مش اجتهاد مني دا تكريم لكل واحد علمني وليه الفضل عليا واعتبر الجائزة حافز لي فيما هو قادم وانا حاسس اني لسة معملتش حاجة وأهدي تلك الجائزة للنجم عادل إمام".

مهرجان القاهرة السينمائي الدولي 2024

 وتشهد الدورة الخامسة والأربعين من مهرجان القاهرة السينمائي، مشاركة 190 فيلمًا من 72 دولة بالإضافة لحلقتين تلفزيونتين، بينما تشمل الفعاليات 16 عرضًا للسجادة الحمراء، و37 عرضًا عالميًا أول، و8 عروض دولية أولى، و119 عرضًا لمنطقة الشرق الأوسط وأفريقيا.

 مهرجان القاهرة السينمائي الدولي، هو أحد أعرق المهرجانات في العالم العربي وأفريقيا وينفرد بكونه المهرجان الوحيد في المنطقة العربية والأفريقية المسجل ضمن الفئة A في الاتحاد الدولي للمنتجين بباريس "FIAPF".