إشراقات
موت.. حمار!
لن تستطيع أبداً أن تمنع نفسك من الضحك.. وأنت تقرأ تفاصيل هذا الحوار.. مع حمار ميت.. بصراحة فى هذه الأيام الصعبة.. يظل الضحك هدفاً والكوميديا رسالة، اقرأ الحوار الفيسبوكى الجميل وادعيلي..
مواطن مربى حمار.. صحى الصبح لقى الحمار ميت:
أخذه ع الدكتور البيطرى.. علشان يعرف سبب الوفاة
تفاجأ من قول الدكتور.. أن الحمار مات بالجلطة
لف المواطن وجهه للحمار ومسك رأسه وأخذ يكلمه بتعجب وحرقة واستغراب!!
جاتلك جلطة ليه؟
قصرت معاك فى البرسيم
خريج هندسة ومش لاقى شغل؟
خريج تجارة إنجليزى وواقف فى سوق الخضار؟
خريج آداب وبتسوق تاكسي؟
خريج حقوق وبتشتغل سمسار؟
خريج زراعة وجالك تعيين فى الطرق والكباري؟
جمعت كل اللى تملكه وأعطيته لابنك علشان يسافر أوروبا وغرق على شواطئ اليونان؟
مديون ومش عارف تسدد ديونك؟
بتستنى دورك فى التعيين بقالك 10 سنين؟
رحت ترخص الكيا ولقيت عليها مخالفات رغم إنك جايبها زيرو؟
مش قادر تشترى ملابس لأولادك؟
مش لاقى شقة؟
قولى.. جاتلك جلطة ليه؟
واخذ قرض ومتورط بالسداد؟
جاتلك فاتورة كهرباء وماقدرتش تسدد ففصلوا عنك الكهرباء؟ الدنيا ملخبطة حواليك ومخك بطل يجمع من كتر القوانين الجائرة؟
رفع الأسعار مش عاجبك؟
شاعر إنك فى ثروات ومش مستفيد منها؟
جاتلك جلطة ليه؟ طلعت على المعاش ومعاشك مش مكفى إيجار بيتك؟
جالك فشل كلوى من المياه الملوثة ورحت تغسل قالولك ما فيش مكان انتظر لما حد يموت وادخل مكانه؟
ممكن أعرف جاتلك جلطة ليه؟
نفسك فى السمك والكيلو وصل 50 جنيه؟
روحت تشترى لحمة لقيت الكيلو بـ120 جنيه؟
جيت تشترى أرز ولقيت الكيلو 10 جنيه؟
روحت تجيب التموين وقالولك ما فيش إلا جبنة دومتي؟
ممكن أعرف جاتلك جلطة ليه؟!!
جاتلك فاتورة غاز بـ150 جنيه؟
جاتلك فاتورة مياه بـ200 جنيه؟
مركب خط نت بـ140 جنيه والنت مابيجيش.. وضعيف؟
نفسك فى التين ومش قادر تشتريه؟ المشمش نزل السوق وخلص وانت ما سمعتش عنه؟
ممكن أعرف جاتلك جلطة ليه!!
تعليمكم فاشل؟
ممكن أعرف جاتلك جلطة ليه؟
ممكن أعرف جاتلك جلطة ليه؟
عايز تقولى إنك بتحس عننا؟
روح الله يسامحك يا عم!!