إشراقات
صعلوك فى وادى الملوك
رسالة طريفة كتبها أحد الاطباء الغلابة والذى لم يتمكن حتى الآن من الحصول على عين واحدة من الثلاث عيون التى يحلم بها كل من يدخل كلية الطب وهى كالتالى عيادة وعروسة وعربية.
صحيح أننا لسنا ضد الأغنياء.. ولا حتى ضد استمتاعهم بمالهم، لكننا ضد السفه والتبذير والسرقة والنهب وأكل المال العام، ورغم كم المرارة التى تحملها الرسالة لكن كمية الصدق التى تحويها تشفع لها. يقول الطبيب الغلبان: أنا مصدوم وقلبى موجوع لكن من غير حقد وحسد والله.. فقد كنت معزوم على الفطار.. اليوم مع كبار رجال الدولة.. وكذلك فنانيها وإعلامييها.. فى قصر أحد حيتان الأراضى والعقارات وصاحب أكبر مناقصات توريدات لكل الوزارات فى كل المجالات والمتزوج من واحدة من كبار سيدات المجتمع المصرى مالا وجمالا. بصراحة المنظر يشرف فعلا إنى عشت لما شفت قصور زى اللى بشوفها فى التليفزيون يسكنها ناس عاديين مثلنا ولكن كروشهم مليانة كيف ولماذا ومتى؟
فمثلا القصر اللى كنا فيه ثمنه حوالى ٨٠ مليون جنيه تقريبا .. على ما سمعت منهم ... والأكل من أكبر الفنادق والخدمة ٥٠ نجمة.. فدماغى لفت الحمد لله كنت شيك جدا واكثر منهم.. رغم ان بدلتى أم ٥٠٠ جنيه المتواضعة من وسط البلد..سألنى معظمهم معاليك شيك جدا يا دكتور اكيد مفكرين البدلة بـ ٢٠٠٠٠ جنيه لكن الحمد لله على كل حال.. جه فى دماغى أسئلة كتيرة منها القصر ده كان ثمن أرضه بكام.. وهل دفع ثمنه.. ولا رئيس جهاز الإسكان ومعاونيه وإدارته بالمنطقة بياخد كام من نوعية السكان دى.. ثمن ورشاوى وشاى بالياسمين لتسهيل التمليك.. أو التقسيط على سنين طويلة.
فسألنى احدهم انت مقيم فين يا دكتور؟!
فقلت له على سكنى فقال لى عندى ليك شقة لقطة فى الخمائل بأكتوبر بـ ٢ مليون جنيه بس ..أو فيلا فى الشيخ زايد بـ ١٨ مليون جنيه بس.. وهتكون من جيران محمد سعد ومحمد منير وشيرين وشريف منير وبقيتهم فى الجنة اللى هى الآجريا فى بيفرلى هيلز .. أرجوكم انا مكتئب.. هى الناس اللى بتاخد ارض من الدولة.. بتاخد المتر بكام وترشى المسئولين بكام .. ومين بيسندهم وملايين الامتار اللى بيتبنى عليها الشقق بالملايين الدولة والشعب بتستفيد منها إيه؟
بصراحة انا نزلت من عندهم وانا عايز ارجع الأكل اللى أكلته لانى حسيت انه هيسممنى وخانقنى لأنى أكلت بشراهة واكثر من طاقتى حقيقة.
يا ناس عايزين حق الغلابة من الناس دى ٥ أفراد من اللى كانوا قاعدين جانبى وبيسألونى أسئلة طبيه هايفة مثل أنهم ماعادوش كويسين جنسيا وبيسألونى مفيش حاجة كويسة تقوينا يا دكتور وضحكاتهم كانت مسمعة الدنيا لميدان لبنان فى المهندسين.. فممكن بثمن كام عزومة من دول يظبطوا كل مشاريع مصر الصحية والتعليمية اللى قائمة على الشحاتة طول السنة وخاصة برمضان الكريم بصراحة أنا تعبت جدا من العزومة دي.