شواكيش
«خُش» فى الممنوع!!
> فى سابق العصر والأوان عقد «ملطوش الحنتوش» مؤتمراً صحفياً عقب اجتماع حكومته ليكشف الأسرار ويجيب عن أسئلة الصحفيين أصحاب القرار..!!
> ولأن الدكتور «ملطوش» حاصل على سبعة دكتوراه وأربعة ماجستير فى إدارة الأعمال وتواصل الأجيال.. فقد بدأ مؤتمره الصحفى بأغنية « تسلم الكبارى».. وسط حشد من رجال الصحافة والأعلام.. بينما وقفت كتيبة الوزراء خلف رئيس حكومتهم الهُمام.. علشان تطلع صورهم فى الكادر تمام!!
> وقبل بدء المؤتمر سأل الدكتور «ملطوش» عن بغبغان الحكومة الفصيح « خُف الريح» لكى يسانده فى صد هجوم «تحاوير» الكــلام!!
> خُف الريح: نفتح الحوار.. مين يفتح مزاد الكلام؟
> الصحفى الفنكوش: سمعت معالى رئيس الحكومة عن الغلاء ورعاياك الغلابة؟!
> ملطوش: أيووووه سمعت عن الغلاء.. بسن فين هما الغلابة؟!
> الصحفى المنكوش: الغلابة ما توا فطيس وكحوا تراب!!
> بغبغان الحكومة (متدخلاً): السؤال اللى بعده!!
> الصحفية لطاشة: الناس شايفة الدنيا « غلا «والعيشة هباب!!
> ملطوش:.. وأنا بصفتى رئيس الحكومة.. شايف الدنيا بمبى والعيشة فحلوقى!!
> الصحفى المعارض (بحدة): ليه بيطلقوا على حكومتك «حكومة الغلاء»؟!
> ملطوش: خُش فى الممنوع!!
> الصحفى المعارض: الممنوع أن الناس فى ظل حكومتك ماتوا من الجوع!!
> ملطوش: متعرفش إن الجوع عليهم حق والدعم علينا مش مستحق!!
> صحفى: هل فى حكومتك علاج على نفقة الدولة!!
> ملطوش: أيووووه.. ما سمعتش عن العلاج « بالكفتة» وحبة البركة!
> صحفى: ترددت أنباء عن تقديم استقالة حكومتك قريباً؟
> ملطوش: حكومتى دى ميقدرش حد يطيرها علشان ليها جناحين!!
> صحفى: ليه الأسعار اليومين دول ولعت نار؟
> ملطوش: عايزك تستحمل يا شعب.. وتغنى أغنية: «الأسعار ناااااار يا حبيبى نار»!!
> صحفى: ما رأيك فى مشكلة الدروس الخصوصية؟
> ملطوش: متفكرنيش بالدروس الخصوصية وإحنا لسة دخلين على الموسم الدراسى!!
> صحفى: مش كفاية نار فاتورة النور؟
> ملطوش: إنت بتقول « عليك نور»!!
> صحفى: امتى هتشعر حكومتك بعيشة وحرمان الغلابة؟
> ملطوش: لما يشحت المواطن الغلبان فى المترو بـ «اللبان»!!
> صحفى:.. وماذا عن أزمات تعويم الجنيه؟!
> ملطوش: دى أزمة خضرااااا وهتعدى.. ههههههه!!
> صحفى: الغلابة نفسهم ياكلوا لحمة؟
> ملطوش: لما الغلابة ياكلوا لحمة.. الأغنياء هيكلوا إيه؟!!
> صحفى: هل مشكلة « العنوسة» تؤرق الحكومة؟
> ملطوش: الجوازات دى مش لازم تتم بعد توليع الدولار!!
> إعلامى:.. وماذا عن مشكلة البطالة؟
> ملطوش: البطالة فى نظام حكومتى المكهربة شُغل كافيهات.. مش كفاءات!!
>>فجأة تدخل بغبغان الحكومة «خُف الريح».. لاحتواء هجمات الصحفيين والإعلاميين المرتدة على رئيس الحكومة.. وسط هتافاتهم الغاضبة: «حكومة أونطة.. رافضين تصريحاتها»!!
[email protected] com