أبشروا يا شباب مصر

أستأنف مجلس برلمان المصطبة جلساته الأسبوعية بعد شفاء الفلاح الفصيح من أزمة صحية استمرت فترة طويلة، واليوم نستأنف جلساتنا التي توافقت مع مرور عام علي حكم الرئيس السيسي.

الرئيس: ندعو الله لشفاء الزميل الفلاح الفصيح ونبدأ الجلسة بتوجيه التأييد لرئيس مصر عبدالفتاح السيسي بمناسبة مرور سنة علي توليه إدارة هذه البلد الناهض ولنبدأ بالمناقشة.

العضو الفلفوس: من فوق المصطبة أعلن أن العهد الجديد هو إنشاء دولة شباب يعني الحكم فيها للشباب لأنهم الأغلبية الساحقة وعلي الشيوخ وكبار السن أن ينعموا بالاستقرار.

العضو زعيط: دلوقتي كل الوظايف للشباب والمشاريع الكبيرة أصبحت ملك الشباب يعني كده بالصلاة علي النبي البلد أصبحت في رقبة الشباب.

العضو معيط: فعلاً لا مكان لواحد مننا عنده أربعين أو خمسين سنة وكل اللي بتعمله الدولة للشباب وده اللي بيحصل فعلاً.

العضو النمرود: طبعاً البلد أصبحت ملك للشباب فمثلاً المليون فدان مين اللي هايستغلها ويزرعها ويقدر صحياً برعايتها طبعاً الشباب ومين اللي بيشتغل في المشاريع اللي بتعملها الدولة الشباب يعني كده الشباب الله يحرسهم.

العضو نطاط الحيط: أنا عاوز أقول نصيحة مهمة خالص لأولادنا إنهم ما يستعجلوش الشغل في يوم وليلة ولكن عليهم شوية صبر حتي يجئ الفرج عن قريب إن شاء الله.

العضو بهلول: والله يا جماعة إحنا في عهد ولادة للبلد من جديد والولادة لشباب في بلد جديد في كل حاجة من الشارع والمصنع والغيط والتجارة يعني كل حاجة جديد في جديد.

العضو العجوز: يا أهل البلد دقت ساعة العمل ولكن علينا الصبر ونقف وراء المسئولين ونؤيدهم لأنهم بيشتغلوا ليل ونهار وده كله حايرجع لكم يا شباب البلد وقولوا معايا عاشت مصر وعاش قادة مصر وعاش حزب الوفد أعرق وأقدم حزب في مصر والعالم العربي كله.

الفلاح الفصيح