ميار الببلاوي : لو الانتحار مش حرام كنت قتلت نفسي (شاهد)

تعرضت الفنانة المعتزلة ميار الببلاوي لإنتقادات لاذعة بعد حديثها عن مشاهدها الجريئة في فيلم "ديسكو ديسكو" في أحد البرامج حيث أوضحت أن الفيلم كان يتم تصويره في شهر رمضان .

(أقرأ أيضًا) ميار الببلاوي تكشف أسرار جديدة عن حياتها الزوجية| سبب تعدد زيجاتها

وقالت "الفيلم كله متصور في رمضان وأنا عندي عقدة من موضوع رمضان دا، آه كنت شابة وبلبس عادي، لكن كان في مشهد مع عمرو عبد الجليل مكنتش عاوزة أصوره لأن كنا في رمضان لدرجة أني دخلت الحمام وقفلت على نفسي بالمفتاح وقعدوا يخبطوا عليا كنت مستنية المغرب يأذن قلت لنفسي حتى لو استغفر الله العظيم هعمل حاجة غلط ميبقاش في الصيام".

انهيار ميار الببلاوي

وبعد هذه الحملة المضادة خرجت الببلاوي عن صمتها بمنشور نشرته على صفحتها الرسمية على موقع التواصل الإجتماعي فيس بوك وقالت :" أنا مش هدافع عن نفسي ومش هقول إني صح بس ربنا شاهد إني بتكلم بعفوية ومبعرفش أتخابث ولا قصدى أي إساءة لأي حد من زملائي اللى بحبهم وبقدرهم وبعتز بأي عمل شاركتهم فيه طوال السنين الي فاتت، وأنا لا عاوزة أجيب سيرة الفيلم ولا المشهد ولا يشرفني.. ونفسي أنسى والناس تنسى بس معرفش ليه بعد 25 سنة بينبشوا في الماضي.. في فنانات عاملين مئات الأفلام وفيها مشاهد نسأل الله المغفرة اشمعنى ميار اللي لازم تترجم وتتبهدل وكل اللي عاوز يعمل شو يبقى عليا".

وأضافت: "أنا برفض كل يوم مقابلات في برامج لكن مروة صبري أخت زميلتي عبير وبحبهم هما الاثنين غير كده أنا حرمت أي مقابلة غير لما أعرف طبيعة الأسئلة وهركز فى كل كلمة ومش هذكر أسماء ولا مواقف بس الصحفيين واليوتيبورز يرحموني من العناوين اللي ملهاش علاقة بالكلام اللي جوه الفيديو".

وأردفت قائلة: " بالنسبة للتريند اللي أنا عاوزة

أركبه -حد الله- أنى أركب التريند بشتيمة الناس ليا وعلشان أكدلكم أنا محولة موبايلي ومبردش على أي صحفي.. أنا نفسيتي تعبت وجالى اكتئاب وابني مضايق جدا وأختي كده كفاية، وبالنسبة لأنى بعمل كده علشان أنا اتنسيت وعندي حب للظهور قولوا اللى يعجبكم أنا ناجحة في برنامجي ولله الحمد وراضية بيه ولو جالي شغل فدا رزق أشكر عليه ربنا مجاليش مش هلجأ للطرق الرخيصة دي علشان أشتغل وبالنسبة للميكب والرموش والضوافر حاضر هشلهم علشان أبقى كده واجهه للحجاب دا كل اللى عندى وأفوض أمري إلى الله إن الله بصير بالعباد".

انتحار ميار الببلاوي

ولم تتوقف الانتقادات منذ منشورها الأخير الذي نشرته قبل 3 أيام لتعيد نشر منشور أخر عبر صفحتها الرسميةعلى موقع تبادل الصور والفيديوهات الأشهر انستجرام قبل ساعات قائلة:" كفايه استحلفكم بالله كفايه لولا ان الانتحار حرام استغفر الله العظيم كنت قتلت نفسى عمرى محسيت كميه الظلم دى الا اليومين دول والله ربى شاهد على الافترا الناس اتهمتنى بيه لمجرد انى قلت الحق او حبيت ادافع غن نفسى تبريراتكم غير مقبوله عندى ومش صح وافترا ارحمونى يرحمكم ربنا طب اهج واسيب بلدى واتغرب انا وابنى اعمل ايه ياخلق".